ORANJESTAD (AAN): Un persona di California a bira e prome caso identifica na Merca di variante Omicron di COVID-19. Esaki a tuma lugar mientras cientificonan ta sigui studia e riesgonan cu e variante nobo di e virus ta trece cune.
E informacion a wordo confirma pa docter Anthony Fauci, epidemiologo principal di Cas Blanco, kende durante un conferencia di prensa, a detaya cu e persona portador di variante nobo a regresa di Sudafrica dia 22 di november, e ta completamente vacuna -sin a haya e di tres dosis- y, den momentonan aki, a presenta sintomanan leve.
E pashent ta den cuarentena y tur su contacto cercano a wordo notifica y te ainda a test negativo pa covid.
Universidad di California, na San Francisco a realiza e secuenciacion genomico di e caso. “Nos tabata sa cu tabata cuestion di tempo cu prome caso di Omicron a wordo detecta na Merca”, Fauci a expresa.
Pa loke ta trata riesgonan di e variante nobo, docter Fauci a remarca cu “no tin suficiente informacion y ainda no tin evidencia cu Omicron ta un variante mas grave, pero sigur nos mester di mas informacion”.
E principal experto den malesanan infeccioso di Merca a bisa cu nan lo haya sa mas riba variante Omicron den dos of cuatro siman, na medida cu cientificonan cultiva y analiza e muestranan di laboratorio di e virus.
Durante e conferencia di prensa di diaranzon, el a reitera importancia di e vacuna, y tambe e booster shot. E tambe a urgi pa tur ciudadano sigui cuida, usa tapaboca y mantene distanciamento social. “Nos mester sigui implementa e hermentnan cu ta den nos disposicion”.
Gobierno di presidente Joe Biden a tuma medidanan fin di luna pasa pa restringi viahenan desde Sudafrica, na e variante a wordo identifica pa prome biaha y a propaga rapidamente.
Centro pa Control y Prevencion di Malesanan (CDC) ta tumando medidanan pa reforza normanan pa viaheronan procedente di extranhero, cu mester wordo anuncia riba diahuebs.
Autoridadnan a indica cu e medidanan aki lo sirbi solamente pa “gana tempo” pa asina e pais por conoce e variante miho y tuma precaucionnan adecua, pero cu, mirando e transmisibilidad, su yegada na Merca tabata inevitable.
Organizacion Mundial di Salud (WHO) a reconoce diaranzon cu e vacunanan contra coronavirus por tar menos eficaz contra e variante Omicron, pero a insisti cu no mester ta causa pa alarma, aclarando cu esaki por sigui duna suficiente proteccion contra formanan grave di e malesa.
WHO a informa cu nan a ricibi notificacion di casonan di variante nobo den 23 pais.
