Trahadornan di Serlimar a dicidi no baha cabes y keda den accion

ORANJESTAD (AAN)—Trahadornan di SERLIMAR a tene su di dos dia di accion Diamars, despues di Dialuna tabata tin esun prome.

E representante di e trahadornan yama Yuri, a comenta cu nan ta dicidi di no baha cabes; Minster Ursel Arends a bishita nan Dialuna, pero a bin cu un solucion cu no ta convence e trahadornan aki.

El a bisa cu nan a cansa di scucha palabra bunita pero cu despues tur hende ta lubida y nada ta wordo haci. E biaha aki, segun e trahadornan, “cos ta caba!”

Nan ta para pa nan derecho y nan kier wak tur cos preto riba blanco y e ora ey nan ta reanuda trabao. E problema ta cu tur nan promocion y periodic ta para, y awo a bin traha eynan un señora di fam Tromp, cu ta un pensionado, cu a bin gana un suma halto pa dia, y e director interino señora Lacle no por tuma tur sorto di decision pero e ta nombrando hende eyden sin cu tin “open solicitatie”, segun e representante di e trahadornan a comenta.

El a bisa cu nan kier pidi gobierno pa e cobranza pa lanta sushi, hinke den esun di awa of coriente pa asina evita tur e problemanan cu tin aworaki.

Gobierno ta bisa cu ni ELMAR ni WEB kier haci esaki, pero Yuri ta puntra di ken e dos companianan aki ta? No ta di gobierno? Serlimar ta un compania di gobierno te ainda, no obstante cu e ta suigeneris. Nan a pidi gobierno tambe pa bula cabes di e dos señoranan tanto Lacle como Tromp.

Tromp nan no conoce ni sa ken e ta, segun Yuri.  El a agrega cu nan a cumpra un programa di 180 mil florin cu e trahadornan no sa pakico e ta, mientras cu no tin placa pa e trahadornan mes.

Nan periodic ta para y for di 2018 nan no ta haya uniform mas. E trahadornan ta traha cu sandalia of cu keds y si un di nan haya un accidente cu perde un dede, nan seguro no ta cubri esey. Nan ta disgusta cu nan a kita 5% y 12.6% di nan entrada pa cubri FASE, pero nan ta kita e placa pa paga debe di Serlimar cu e trahadornan no a haci, ni a horta Serlimar pa nan ta pagando debe.

Nan kier 5% bek y nan vakantie uitkering completo bek, pues nada di e mitad. Esaki ta varios di e puntonan cu nan ta lucha pe, ademas di un bon ambiente di trabao.

Tambe tin un empleada cu e ex-minister di infrastructura a pone eyden, cu a perde dos caso den Corte pero e ta haya tur su placa bek y bolbe bin traha y esey ta trece frustracion. E trahadornan kier wak e sentencia di Corte di e persona aki.