ORANJESTAD (AAN) – Minister di Salud Publico, señor Dangui Oduber, den conferencia di prensa a elabora riba e rutanan nobo y el a informa cu dia 20 di November proximo, e vuelo inaugural di Frontier Airlines pa Aruba for di Miami, lo wordo inaugura.
Ministerio di Turismo a wordo invita pa participa den e vuelo inaugural aki, y e ta aprecia hopi e invitacion aki. “Intencion ta pa nos bay explora e mercado di Denver. Frontier Airlines ta original di Denver, Colorado y e ta estableci eynan. E intencion ta pa uza Miami como hub pa bula pa Aruba. Tambe tin otro vuelo inaugural for di Boston, y esaki ta dia 18 di December cu Delta Airlines. Esaki tambe ta un vuelo nobo cu durante e ultimo lunanan aki, gobierno a yega na palabracionnan concreto cu e aerolinea pa cuminza bula e ruta directo aki”, e dignatario a señala.
El a agrega cu esaki ta un ruta hopi positivo, cu ta trece turistanan afluente. Semper e mercado di Boston tabata un mercado hopi atractivo pa Aruba, y cu e vuelo adicional aki nos Isla ta bay haya asiento atrobe, ademas di loke Aruba tin caba for di Boston. E mandatario ta haya importante tambe, pa menciona tur e servicionan cu ta wordo reanuda despues cu nan a wordo cancela durante e aña y mey aki di pandemia.
El a menciona e servicionan di La Guardia, cu ta un vuelo directo di American Airlines, mescos cu e vuelo di Chicago y Dallas, y ademas Minneapolis, cu tambe ta vuelonan directo di American Airlines.
Minister Oduber a indica cu tur e servicionan aki ta bay wordo reanuda y lo haya vuelonan adicional di destinacionnan cu Aruba no tabata tin e vuelonan aki.
Minister Oduber a referi tambe na e distribucion di e mercado Mericano, cu 92% di e trafico (turismo) cu Aruba ta ricibi ta bin for di East Coast, Boston, New York, Massachusetts y e resto ta bin for di Mid West y South West.
E dignatario a agrega cu esaki ta e mercado di mas importante pa Aruba. Semper Merca tabata y ta e prome mercado, esun cu ta produci miho pa nos pais y cu ta duna e miho resultado, y ta trece turistanan afluente conforme gobierno su maneho y vision; y cu tin un entrada anual superior na 150 mil dollar. “Esaki ta e target cu nos a pone, y nos ta hopi contento y satisfecho cu e proyeccionnan cu nos a ricibi for di Airlift Commissie, y mi kier gradici e comision aki como tambe ATA, AHATA, pa tur e esfuerzonan cu nan ta haci pa engrandece nos turismo; y nos por premira caba cu aña 2022 lo bira un hopi bon aña pa loke ta trata nos turismo”, e mandatario a subraya.
