Trahadornan di RBC a protesta pa un ora debi na e ciere di Call Center

*e Call Center a wordo traslada pa Trinidad! ORANJESTAD (AAN) – Diabierna mainta,   trahadornan di RBC a dicidi di drenta den accion cu un protesta di un ora.

E ex-presidente di FTA, Hubert Dirksz, den un entrevista cu DIARIO, a splica cu locual ta tumando lugar pa hopi tempo caba y cu semper e trahadornan a tume cu “e ta pa miho” pero e problema ta cu, constantemente, algun departamento di RBC Aruba, ta wordo cera y habri na otro pais.

E ultimo cu a tuma lugar ta e asina yama “call center” no obstante, tur e yamadanan di RBC den e region aki, ta bin Aruba.

E motibo pa scoge Aruba ta cu un hende cu ta atende e yamada por contesta sea na Hulandes, Ingles, na Spaño, y na Papiamento. Nan a traslade pa Trinidad, unda cu aya unico idioma cu nan ta papia ta Ingles, loke no tin ningun sentido, Hubert Dirksz a comenta.

Pa e motibo aki e call center a bin Aruba entre cuater pa cinco aña pasa. Aworaki, nan a dicidi di cera e departamento aki unda cu di diesun trahador, siete a keda perhudica y cuater so a keda.

“Nos ta bisa semper cu un compania tin e prerogativa di cuminza traha cu ‘x’ cantidad di trahador, y si nan mester bahe e por. Pero no por ta asina cu bo tin diez trahador, bo ta kita cuater y e otro seis tin cu traha pa diez”, Dirksz a subraya.

“Nan ta bisa cu e trabao ta bay afo, pero en realidad, na final di dia, ta na Aruba e ta keda haci toch” el a agrega.

Esey a trece e malcontento cu e trahadornan a bay pafo pa un ora pa desahoga nan disgusto.

“Nos tin un carta traha y gerencia, pa 9’or mester a baha tuma esaki unda cu Dialuna awo nos kier papia pa bisa nan kico ta e malcontento y con nos ta mehore, pasobra e manera di traha den e banco aki, no por sigui”, segun e sindicalista di FTA.

El a agrega cu pa e  problema di Covid-19 e cantidad di trahador ta keda limita, locual FTA ta compronde, y cu pesey tin hende trahando na cas. Esey no ta e problema Dirksz a indica, sino e cantidad di trabao pa poco hende.

FTA ta bay reuni cu gerencia Dialuna pa discuti e situacion y despues ta informa e trahadornan di RBC kico ta e resultado.

E Presidente nobo di FTA, tambe a hiba palabra, cual declaracion por lesa den otro articulo.