Trahadornan di AruTram a haya razon di huez y ta bay haya nan placa bek

ORANJESTAD(AAN): Secretario General di SEPPA Magaly Brito Dialuna a duna un splicacion riba un caso den corte relaciona cu e trahadornan di AruTram.

El a splica cu aña pasa e trahadornan a bay den accion, despues cu no a cumpli cu diferente di nan exigencianan.

E empleadonan a splica director cu nan uniformnan ta daña, mancha etc. y debi cu no nan no a wordo duna uniformnan nobo, nan a drenta den accion.

“Toch e accionnan ey a yuda un poco, pasobra basta lihe a bin cu uniformnan nobo, pero asina mes e dunador di trabao a bay over na kita placa for di e trahadornan, pa e dianan cu nan lo no a bisti uniform y a bay traha cu paña normal”.

 Esey tabata e motibo pa cual e trahadornan a cuminza un caso den corte, segun Brito.

El a splica cu huez a duna e trahadornan razon y a indica cu un dunador di trabao mester cumpli cu locual tin para den e contrato laboral.

Segun Brito, huez a duna di conoce cu si e trahador pidi pa e dunador di trabao cumpli y e no haci esaki, e trahador tin e derecho di mustra su mal contento na e forma con esnan di AruTram a haci esaki.

“Esaki ta nifica cu e dunador di trabao tin cu debolbe e placa cu el a kita for di e trahadornan, pues nos ta spera cu ainda e luna aki e dunador di trabao cumpli cu esaki”, segun e Secretario General di SEPPA.