Trahadornan di Arubaanse Wegenbouw ta yen di animo trahando riba rotonde

ORANJESTAD (AAN): Te cu awor e trabao riba e di segundo mitar di e rotonde di Avenida Nelson Oduber, na Palm Beach ta bayendo basta bon!

  Casi no a topa cu ningun contratempo causa door di tempo of yobida den e proceso.

   DIARIO a pasa check e trahadornan, y a nota cu nan tin hopi animo, y ta mustra cu balentia y alavez orguyo di ta trahando riba loke nan ta insisti, di lo bira e rotonde mas bunita di Aruba.

   E rotonde na Palm Beach aki ya ta habri mitar, pa asina fluho di trafico por sigui.  Pero corda bon cu ainda falta un capa di asfalt final riba dje, y pesey kizas e pida concrete separador mey-mey (cu DOW ta yama “lomba di cacho”) ta mustra di ta halto.  Ta ora cu e capa final di asfalt yega riba dje, e lo bira suave y smooth.

   Nan a sa di traha y perfecciona tur spulado cu tin eybanda pa asina percura cu fluho di awa ta pasa corecto bao di e rotonde.  Tur tuberia di WEB Aruba NV, kabelnan di NV Elmar, Setar NV, Fiber Optic, y Setar Cable Services a haya nan lugar adecuado.

   Nan ta contento cu e teamwork, e empuhe di supervisornan, y con perfecto tur cos ta canando pa asina aki par di luna nan keda cla full cu e rotonde aki.