KRALENDIJK: Den fin di siman, Gobierno di Bonaire a emiti un advertencia como cu tin riesgo cu bo por haya pida of resto di glas den cierto productonan fabrica pa e compania hulandes Heineken.
Ta trata aki di boternan di cerbez di 25 centiliter, di cual e tapadera ta twist-off (‘draaidop’) riba dje. E cerveceria a anuncia cu pida glas por kita for di e bom di e boter, y esaki ta resulta den e contenido.
E advertencia ta valido pa cerbez tipo ‘original’, tambe ‘0.0’, y e variante ‘Silver’.
Gobierno di Kralendijk den nan boletin, ta splica cu ta trata aki di e siguiente productonan procedente di Hulanda, cualnan tin fecha di caduca di 31 Januari 2023.
- Heineken bier Mono 6x25CL.
- Heineken bier Mono 12x25CL
- Heineken 0% FL 6x25CL.
Na Hulanda, e palabra “Mono” aki nifica cu e boter no tin statiegeld riba dje. Pues e ta un boter cu despues di uso, bo ta benta den baki di sushi.
Segun Gobierno di Bonaire, si abo a cumpra un di e productonan aki, y cu tin e vervaldatum di 31 Januari 2023 imprimi riba dje, e ora nan ta conseha pa bo no habri y bebe e contenido.
E seccion di Directie Toezicht en Handhaving na Bonaire ta keda mantene e situacion aki na bista.
