Tractor a kibra tuberia grandi afectando hopi cas na Rooi Santo y Opal

Diahuebs anochi trabao urgente di reparacion

Tractor a kibra tuberia grandi afectando hopi cas na Rooi Santo y Opal 

ORANJESTAD (AAN): Diahuebs atardi poco prome cu bahada di solo, un operador di un Hydraulic Excavator operando cu un breaker attachment den bario di Opal na Noord, a ranca y kibra un tubo grandi di WEB Aruba NV.

   E cantidad di awa cu a cuminza basha afo, mesora a afecta habitantenan di e.o. Opal, Rooi Santo, y tambe Aruba Raquet Club.  A core yama WEB Aruba NV, y ora cu personal a yega eynan, a bin topa cu tur cos bao awa, y indicando cu ta un trabao grandi di reparacion tin di wordo haci.

   A mira cu e hydraulic excavator di marca Hitachi a kibra un tubo grandi, y esaki tin di wordo drecha.  Esaki ta inclui un logistica di manda busca extra trahador, manda busca tubo nobo, y traha un plan con pa haci e reparacion.

   Awa a wordo corta pa adresnan di Rooi Santo 1 te cu 9-G, tambe di 209 te cu 234, adrwsnan Opal 1 te cu 136, y e tereno di Aruba Raquet Club.

   WEB a traha hopi duro pa drecha e tuberia, y ya pa 8:06 pm a duna awa bek na barionan di Rooi Santo y Aruba Raquet Club.  E trabaonan na Opal ainda a sigui y tabata mas complica.  Pero pa 9:20 pm, nan a keda cla cu tur trabao y tur cas a haya awa bek.