Trabaonan mantencion di caretera cu ta tumando lugar ta superficial y no structural  

Lysander Wernet di CIC NV Green Corridor:

ORANJESTAD (AAN)— Representante di CIC NV Green Corridor, Lysander Wernet, den entrevista cu DIARIO a aclarea cu e careteranan cu ta hayando “micro-pavement” na Aruba ta den bon condicion ainda, y e trabaonan di mantencion cu ta wordo haci awo no ta e parti structural.

“E trafico cu nos tin ta wordo considera toch basta liviano, pero e intervencion aki ta superficial, pa mehora e parti funcional no e parti structural.

Structural ta ora cu ya e caminda a bay den un deterioro mayor, unda cu ya e intervencion ta mas costoso, e ta bay ta un reconstruccion of rehabilitacion. Pesey na e manera corecto manera a ilustra riba e grafico, ora e caminda ta den bon condicion ainda, e ta wordo interveni, pues dune su funcionnan bek”, señor Lysander Wernet a reitera.

Lysander Wernet a menciona cu nan a trece expertonan di afo, por ehemplo, e ingeniero specialista den pavimento, señor Luis Miguel, cu a experiencia esaki den otro paisnan. Hunto cu DOW y CIC NV tambe el a haci un bishita na Colombia, pa e laboratorio conoce e “inflacion” y tambe a recore varios caretera na Colombia unda cu varios aña atras e micro-pavement a wordo introduci, na unda e careteranan ta den super bon condicion siendo cu aya si tin trafico mucho mas pisa, y ora tin awacero e ta bon cubri.