Di “Haviland Comet”pa awe, alma y motibo di turismo no a cambia
*E caracter propio di Aruba mester ta garantisa den futuro di turismo
ORANJESTAD (AAN)—“Haviland Comet”tabata nomber di e prome avion “jet” comercial, cu a lanta su vuelo dia 9 di januari 1951.
Di e forma aki e inicio di e asina yama “era di jet”, a haci su entrada den historia humano y a introduci cambionan grandi.
E motornan poderoso di Jet, a nace den Segundo Guera Mundial, cu a cambia mundo pa semper.
Inicio di e Era di Jet, pa Aruba sigur tabata importante pasobra el a habri porta pa e isla haci uzo di su rikeza natural mas stabil y mas grandi, cu tabata turismo cu a bira base economico di e pais cu e infrastructura cu un naturaleza unico, a ofrece e isla den e braza di laman Caribe, cu ta uni oceanonan y continentenan, e base pa e ala economico cu Siglo 20 a crea pa mundo.
Vacacion a bira mundialmente mas cu un derecho di hende y a bira parti di un bida normal.
Si den e era di descubrimento di otro paisnan dor di Europa, cu asina a planta su bandera na continente Americano y den Caribe, barconan tabata habri continuamente rutanan nobo pa topa cu centronan cu por a entrega material manera oro pa economia por a florece, despues di guera ta topa cu un crecemento enorme di loke a wordo yama turismo, cu awe ta base di sobrevivencia humano na hopi pais.
Cifranan oficial ta entrega prueba di e cambio economico mundial unico cu turismo a trece pa mundo, cu tin un ehempel na Aruba, cu un economia pa cual naturaleza a crea e ingrediente principal.
Turismo mundialmente a bira fuente di entrada creciente pa hende, pero mescos cu tur otro ala economico, tin su exigencianan pa evita cu e exito y logronan economico pa motibo di varios aspecto, ta mishi cu e derecho democratico mas grandi di hende cu ta e derecho di mantene su integridad nacional, su propio cultura, su propio base di felicidad cu no ta solamente placa pero tambe tur loke naturaleza ta ofrece.
Den caso di Aruba tambe, turismo a crea un economia nobo, cu conoce e fragilidad di dependencia di sucesonan mundial pero tambe e peligro grandi cu turismo por bira enemigo di turismo sin un bon guia.
Den historia di turismo como sector economico, ta topa cu cantidad di casonan den cual e destinacionnan mas famoso y na e nivelnan mas halto cu turismo a conoce, a destrui nan mes pa e solo hecho cu nan a destrui nan caracter propio y e motibo pa cual nan tabata atrae turismo.
Pues e caracter nacional, e rikezanan propio di e pais, mester wordo cuida y conserva mientras mester evita cu ta kibra bareranan pa forza crecemento, cu mester tin un limite pa turismo keda exitoso.
E calidad mas importante den e industria turistico di Aruba, ta keda su hendenan, un Pueblo cu a desaroya den e aire liber di su beachnan sin frontera.
E industria turistico di Aruba ta basa riba tradicion y cultura di Aruba entrega dor di un generacion pa otro, den cual cordialidad y cordialidad ta central.
Na hopi ocasion DIARIO a mustra cu mester evita cu super produccion di e ramo turistico ta mishi cu bienestar, felicidad y caracter di un Pueblo y asina ta destrui su mes finalmente.
Paisnan grandi awe ta entrega prueba di situacionnan serio cu ta surgi ora un pais no reglamenta su crecemento y percura pa e tin suficiente forza humano pa sigui entrega e cara di e pais cu a bira e etiketa pa exito.
Pa expansion economico ta realmente productivo, e mester sostene e base di felicidad y bienestar nacional cu ta basa ariba bienestar y felicidad di henter Pueblo cu mester por sigui cana como Pueblo, pues grupo cu ta mantene su identidad propio.
Un motibo di fracaso den e mundo di turismo, ta e hecho cu na demasiado ocasion no ta pone un limite na expansion, manera ta un necesidad real pa tur ramo economico cu kier keda entrada real di bienestar di Pueblo y Pais.
Na diferente destinacion reconoci rond mundo, poblacion ta bay contra e industria di turismo, pa motibo cu no a tene e caracter y bienestar nacional na cuenta.
Na Aruba, sinembargo, e caracter nacional, a bira e atraccion principal di turismo, cu na Aruba tin un angulo hopi interesante pero tambe motibo pa bon vigilancia.
Aruba, cu ta un isla chikito cu un poblacion chikito, ta uni turismo di diferente categoria, loke ta resulta den diferente exigencia y bon estudio di loke inversion pa e diferente ramonan ta rekeri, sigur si tuma nota di rapportnan cu ta papia di cambio cu ta presenta den e ramonan turistico di Aruba.
For di e momento cu e Era di Jet a habri portanan nobo pa turismo, desaroyonan nobo ta presenta nan mes.
Economia mundial internacional a drenta e proceso pa cual tanto DIARIO a adverti Aruba di cambionan grandi cu ta mishi cu sistemanan economico mundial.
Inversionnan nobo den acomodacionnan, cu mester wordo continuamente adapta na cambionan general mundial den tur loke turismo ta brinda mundo como pakete di hospitalidad, cu ta depende di un parti grandi di e actitud y reputacion internacional di un Pueblo.
E identidad di Aruba y e Arubiano mester ta garantia den tur desaroyo turistico na Aruba cu mester ricibi tur atencion di Parlamento y gremionan como ader mayor di economia, cu mundialmente ta bou tension pa e daño cu a wordo causa pa globalisacion cu a bira destruccion di originalidad di e pais y asina destruccion di e ader economico mayor nacional.
