Trabaonan di renobacion di trapi na Rodgers Beach ta avansando

ORANJESTAD (AAN):  Tabata algun luna atras cu Minister di Turismo y Salud Publico Sr. Dangui Oduber a anuncia e proyecto di renobacion di e trapi na Rodgers Beach.

            Actualmente e trabaonan di renobacion ta avansando y pronto e proyecto lo keda entrega. E proyecto di renobacion di trapi ta un di e varios proyectonan cu ta forma parti di e masterplan cu Minister Oduber tin pa San Nicolas. E proyecto aki a wordo financia cu fondonan di Aruba Tourism Authority (ATA).

Na momento cu Minister Oduber a drenta Gobierno na 2017, Gobierno tabata tin un vision y un masterplan pa San Nicolas. Den esaki a inclui e proyecto di Baby Beach fase 1 y 2 (fase 1 ya caba a wordo entrega), a inclui e renobacion di e oficina di turismo na San Nicolas. A introduci e festival cultural di Island Fest cu lamentablemente mester a para temporalmente door di e pandemia. Tambe Minister lo bay percura pa embeyece henter e area di Rodgers Beach mescos cu ta haciendo na e area di Baby Beach, e proyecto di trapi ta e comienso.

Minister Oduber ta sigui demostra cu Gobierno ta kere den e potencial di San Nicolas pa bira un segundo capital turistico di Aruba. Pesey Minister Oduber lo bay sigui inverti tambe den e oficina di Turismo di San Nicolas. Minister Oduber ta hopi satisfecho di con e proyecto di trapi na Rodgers Beach ta canando, pronto e bunita proyecto aki ta bay wordo entrega.

Finalmente Minister Dangui Oduber ta gradici Ministerio di Infrastructura y DOW pa e bon cooperacion brinda.