ORANJETSAD (AAN): Despues di su prome actividad na fin di november 2021, cu tabata un exito unda mas cu 40 ingeniero di Aruba a participa,
e circulo Caribeño di KIVI (“KIVI Kring Caribbean”) ta organiza su di dos actividad dia 17 di februari 2022 di 6 pa 7 p.m. cu lo ta un webinar.
E webinar aki ta carga e titulo “Energy Efficient Building Design for a tropical climate” y ta ofrece e ingeniero profesional informacion tocante con pa diseña un edificio mas eficiente cua energia cu ta posibel. E webinar lo worde duna pa Dr. Richenel Bulbaai, actualmente decano di e faculdad di ingeneria di Universidad di Curaçao.
Dr. Richenel Bulbaai a obtene su doctorado na aña 2019 na Universidad Tecnico Twente na Hulanda, despues di a termina su studio den ingeneria electrico na Universidad di Curaçao y na Universidad Technico na Eindhoven Hulanda. Ademas Dr. Bulbaai ta un Master in Business Administration.
E titulo di e disertacion di Dr. Bulbaai ta ta “Toward 100% Sustainable Energy Production and a structural decrease in energy demand: Curaçao, as a case study of Small Island Developing States”. E ta masha interesa den con pa diseña y construi edificionan teniendo cuenta cu clima tropical. Durante su presentacion Dr. Bulbaai lo duna mas informacion con pa uza e principionan pa un diseño tropical manera ta ilustra aki abao, teniendo cuenta cu e movecion di aire den un edificio.
KIVI Kring Caribbean ta invita tur ingenieronan profesional pa atende e webinar aki y inscribi via e link:
Tambe KIVI Kring Caribbean te anuncia su di tres actividad na maart 2022 cu lo ta un charla di ingeniero Diego Acevedo cu lo elabora mas tocante di su research pa haci uzo di e “brine reject di membranes” cu ta worde descarga durante e produccion di awa dushi aki na Aruba. E anuncio di e charla aki lo sali mas despues.
