Rino Hermans, director CMO:
ORANJESTAD (AAN) – Director di CMO (Crisis Management Office), señor Rino Hermans, a elabora den entrevista cu DIARIO tocante e control cu CMO hunto cu Cuerpo Policial ta realiza, den e temporada aki di carnaval.
Hermans a menciona cu e proceso no a cambia, y e ta den man di KPA, cual ta pone su reglanan pa e gruponan di carnaval cumpli cu eseynan.
El a bisa cu e mes a wak un fakkel optocht unda cu practicamente e por a mira cu e lidernan di grupo a sigui cu e maneho di 2024, y polis ta den dialogo cu tur e gruponan hunto cu CMO y SMAC.
Rino Hermans a subraya cu por mira cu e seguridad ta pa tur hende, kiermen pa henter pueblo. El a remarca pa no lubida cu tin 120 mil hende riba e Isla aki, di cual di 50 pa 60 mil so ta participa den carnaval, y e otronan mester sigui haya e mesun servicio di pais Aruba.
Rino Hermans a splica cu CMO ta traha riba e maneho, den consenso cu e “dienstnan uitvoering”, y nan ta bisa kico tin y si algo sosode CMO tin cu presenta esaki na Ministerraad.
DTI a cuminza controla su trailernan y CMO ta update otro siman. E parti logistico di Hospital tambe ta cla caba. Y asina nan ta prepara pa brinda e servicio na comunidad y e parti di seguridad. Finalmente, el a expresa cu e samenwerking ta tremendo!
