Trabaonan andando pa mehora area di Baby Beach

ORANJESTAD (AAN) Manera ya caba DIARIO a trece dilanti, Gobierno hunto cu ATA,

Departamentonan di Infrastructura y Ministerio di Infrastructura a anuncia e master plan pa mehoramento di infrastructura, upgrading, embeyecimento, percura pa tin iluminacion y landscaping pa area di Baby Beach como tambe Rodgers Beach.

    Nan ta trahando mas espacio pa parkeo, y pa organiza y structura esaki miho lo bin un rotonde den e cruzada. Lo percura pa tin iluminacion pa bay Baby Beach y Rodgers Beach y tambe un bunita landscaping cu matanan di coco y diferente vegetacion, den henter e area aki.

   Pa loke ta trata e di tres fase di e proyecto ta encera e construccion di dos kiosco; lo mester move e turtle wall un tiki mas patras, teniendo en cuenta cu e desaroyonan cu tin cu ta e hotel Secrets y e Hotel Boutique, cu lo wordo traha den e ex-Esso Club, ta bay mas volumen di hende cu ta bay bishita e area aki ademas di nos localnan cu regularmente ta bin. Esey a pone cu a tuma e decision pa move e turtle wall, pa asina haya mas espacio riba e santo blanco pa e beach bira mas grandi, y tambe ta bay reconstrui e trapinan cu ta ubica den e parti aki pa conecta e area aki cu ariba di e seroe na Seroe Colorado.

   Tambe lo percura pa drecha tur e canchanan deportivo pa percura pa nan ta multifuncional. E intencion ta pa tin dos cancha di tennis. Manera ta conoci, antes tabata tin cuater cancha y ta bay reconstrui dos y e otro dos lo percura pa funciona como uso mixto di beach volley, beach soccer y beach tennis.