Parlamentario Fraccion di MEP, Ricky Hoek:
ORANJESTAD (AAN): Parlamentario di Fraccion di MEP, Roderick 'Ricky' Hoek a bisa durante un rueda di prensa diaranson cu un noticia positivo cu for di siman pasa caba a sali den medionan di comunicacion na Aruba y tambe den Reino ta esun relaciona cu finansas di Aruba.
Siman pasa, College Aruba Financieel Toezicht (CAft) a entrega su raportahe unda a trece dilanti varios aspecto caminda ta elogia e maneho di Gabinete Wever-Croes II. Hoek a indica cu Parlamento a haya bishita siman pasa di CAft unda cu por a scucha e puntonan positivo cu a bin dilanti caminda CAft a recomenda y a elogia Gobierno di Aruba.
El a bisa cu e elogio aki no ta bin sin mas. Tin e trabao duro cu tur e ministernan di Gabinete Wever-Croes II a bin ta haciendo caba desde Gabinete Wever-Croes I. Despues di un temporada hopi dificil, manera esun di e pandemia cu a azota no Aruba so, pero mundo henter, awe por bisa cu en berdad e gobierno aki ta trahando seriamente na progreso y desaroyo di pais Aruba. Esaki ta un mensahe cla pa tur partner den Reino, cu Aruba ta serio den su decisionnan y su determinacion pa traha y saca Aruba for di debenan cu tin actualmente, a remarca.
Parlamentario Hoek a sigui bisa cu algun punto cu CAft a trece dilanti ta cu e economia di Aruba a recupera completamente danki na un turismo resiliente como tambe na e trahado local cu a brinda un servicio di calidad na e huespednan cu ta bishita e isla. Aruba ta bay tin un surplus di mas di 1 % na 2024 y esaki lo libera miyones inverti den nos pais. Ya caba e ministernan a presenta e inversionnan cu nan ta bay haci den e aña binidero.
"Esaki ta un punto sumamente valioso y importante. Pakico? pasobra caminda cu un gobierno haci inversion den e pais, nos sa cu eynan tin un desaroyo. Eynan nos sa cu tin progreso", a bisa. Inversion ta bay tin den tur ministerio, a remarca, y di esaki ta tur inversion ta bay ta na beneficio di pueblo di Aruba.
El a agrega cu presupuesto di Aruba ta cumpli cu tur e normanan y esey ta un di e puntonan hopi importante. A pesar di tur e contratiemponan cu ta hayando cu e negociacionnan cu Hulanda y a pesar cu mester a firma e acuerdo di 6.9 % pa asina Aruba mantene su rating internacional, ya cu 85 % di e debenan di pais Aruba ta cu banconan internacional. Mientras cu 15 % so ta e fiansa di 916 miyon cu mester a haci pa COVID." Danki na e normanan cu nos ta cumpli cu ne pa cu presupuesto, Aruba ta bon para", a Hoek a expresa.
