Hues a cancela temporal e CAO pa aumento di salario
ORANJESTAD (AAN): Hues di Corte di Husticia, den un caso sumario cu Post Aruba N.V. a cuminsa contra SEPPA, a dicidi cu ta cancela temporal e CAO cu ta papia di un aumento di salario tur aña di 105 florin.
Ayera Hues a dicta sentencia den e caso sumario pendiente di e caso mas profundo cu Post Aruba N.V. a cuminsa contra e sentencia di Corte di 4 Juli 2023.
Stop di paga aumento: Ta asina cu entre Post Aruba N.V y SEPPA tin un CAO firma cu ta di 2010 pa 2013. Articulo 25 di e CAO ta bisa cu Post Aruba N.V. cada aña na Januari ta duna e empleadonan un aumento di salario di 105 florin.
Dia 28 Augustis 2013. Post Aruba N.V. a cancela e CAO y a bisa SEPPA cu door di e situacion financiero malo, no por sigui paga e aumento.
Hues a ordena pa sigui paga: Un grupo di 10 empleado a cuminsa un caso profundo caminda 4 Juli 2023, Hues a dicidi: 1) Ta keda mantene e CAO tanten cu entre e partidonan no tin un CAO nobo. 2) Post Aruba N.V. mester keda paga e empleadonan e aumento di 105 florin manera ta para den e CAO.
Post den bancarota: Post Aruba N.V. a cuminsa un caso sumario caminda ta pidi Hues pa para e aumento di salario entrante 1 Januari 2022, te ora cu Hof dicidi riba e apelacion di Post Aruba N.V. contra e decision 4 Juli 2023 cu ta ordena Post Aruna N.V. pa paga e aumento. Post Aruba N.V. cu relato financiero di 2013 a mustra cu pa añas nan ta bancarota y cu ta Gobierno ta pagando e aumento. SEPPA ta reacciona cu Hues mester declara Post Aruba N.V. no admisible.
Evaluacion di hues: Hues den su evaluacion ta mustra cu for di e relato financiero di Post Aruba N.V. di 2013, ta mustra cu Post Aruba N.V. ta bancarota pa añanan largo. Hues ta haya cu SEPPA no a contradeci esaki suficiente. Post Aruba N.V. ta mustra cu ta te Januari 2022 Gobierno a paga e aumento y no mas. Hues ta haya cu Post Aruba N.V. no por sigui paga e aumento, si Gobierno no tin placa pa esaki.
Para aumento: Hues su decision ta cu e ta para e aumento di salario entrante 1 Januari 2022 te ora cu Hof tuma un decision den e caso mas profundo cu Post Aruba N.V. a cuminsa. Hues a pone como condicion cu te mas tarda 31 December 2023 e caso mas profundo mester ta cla cu sentencia.
