Trabao pa proyecto nobo di planta di awa a cuminza na WEB Aruba NV

Advertencia pa esnan nabegando cerca planta na Balashi

ORANJESTAD (AAN): Manera a keda publica caba, e compania WEB Aruba NV ta avanzando cu su proyecto pa construi e di tres planta di Awa.  E proyecto ey ya ta den ehecucion.

   A ser splica cu e di 3er planta tipo Sea Water Reverse Osmosis (SWRO) na Aruba ta hopi necesario pa por cumpli cu e demanda creciente pa awa di bebe na Aruba.

   E proyecto yama oficialmente SWRO-3, y ta encera trabaonan intensivo cu ta den ehecucion simultaneamente riba tereno di WEB Aruba na Balashi, y na e area di lama dilanti di plantanan di WEB.

   A compronde cu tur trabao preparatorio a sosode Diasabra cu a pasa, y e trabaonan lo sigui e siman aki, y tambe otro siman.

   Pesey WEB Aruba NV ta conseha tur esnan den boto nabegando dilanti costa di WEB, pa tene cuenta cu tin trabaonan andando durante periodo di 27 di Januari pa 6 di Februari.   Gerencia di e planta di awa y electricidad ta pidi su disculpa pa posibel inconveniencia.