ORANJESTAD (AAN): Bon noticia ricibi di DVG. Departamento di Salud Publico ta informa cu e trabao di renobacion y matencion na abattoir a keda cla.
Veterinaire Dienst ta recorda tur persona cu kier sacrifica un cabrito, carne of porco pa consumo mester haci esaki na Abattoir. Matamento di bestia na cas ta ilegal y por tin su riesgo nan pa salud di hende. Tur hende cu kier haci uso di servicio di Abattoir pa sacrifica un bestia por haci esaki riba Diamars of Diahuebs, parti mainta cuminizando diamars dia 14 di maart 2023 sigui pa diahuebs 16 di maart 2023.
Alavez ta anuncia cu e proceso di sacrifica animal na Abattoir ta tumando luga a base di afspraak. Doño cu ta desea di sacrifica un of mas animal pa come mester percura pa yama di antemano pa confirma cu e kier haci uso di e servicio di Abattoir. Esaki ta pa purba coordina e matansa na un manera mas structura, cumpliendo cu reglanan di hygiena, protocol di matansa y pa e trabaonan cana bon structura. Pa haci un afspraak por tuma contacto cu administratie di Veterinaire Dienst na telefoon 522-4310 of 522-4320 of pasa personalmente na Veterinaire Dienst Barcadera 1.
Ta pidi encarecidamente pa trece animalnan dentro di e orario duna como afspraak. Si no bin na ora duna na e afspraak mester haci un cita di nobo.
Tene cuenta cu si bo no tin cita, ningun persona lo no worde atendí. Ban coopera pa asina e processo na Abattoir por cana na un manera planifica y tranquilo.
