Trabao di mantenimento di boeinan y ponemento di esnan nobo ta cuminza e siman aki mes

Minister Dangui Oduber y CEO di ATA contento cu e proyecto:

ORANJESTAD (AAN) – Diahuebs mainta, Minister di Salud y Turismo, Dangui Oduber, hunto cu director di ATA Ronella Croes, a haci un anuncio di un proyecto pa evita accidentenan di hende local y  turistanan cu ta haci uso di lama.

            Ta trata di e proyecto di mantenimento y ponemento di boeinan cu ta cuminza e siman aki mes, den e sectornan di Malmok, Arashi, Tres Trapi, Palm Beach y Costa Linda.

            E mandatario a expresa cu e ta satisfecho con e turistanan cu ta bishita Aruba ta aumentando, y October tabata un bon luna di recuperacion (88%) y 99% di turistanan Mericano cu ta Aruba su mercado principal y mas importante. Ta turistanan cu ta aporta hopi placa na  nos economia, e dignatario a bisa. El a subraya cu e turistanan cu ta bin Aruba tin hopi demanda, y entre otro, nan kier pa nan seguridad wordo garantiza.

            Den cuadro di esaki pa basta tempo, Ministerio di Turismo hunto cu ATA ta analizando e producto Aruba den su totalidad, pa wak na unda tin cu haci inversionnan necesario pa, obviamente, mehora nos producto pa mehora e servicio cu kier wordo duna na e bishitantenan.

            E dignatario a splica cu pa hopi tempo caba e boeinan den e areanan di Arashi, Malmok, Palm Beach no ta den e miho estado y prome cu e pandemia e intencion tabata pa bin cu reparacion y drecha e boeinan, pone boeinan nobo unda tin mester; pero e pandemia a haci cu e fondonan tabata limita. E mandatario a subraya cu mirando cu turismo ta recuperando, e situacion financiero di ATA tambe ta conoce un mehoracion, y den e caso aki tin fondo disponible bek pa por haci e inversionnan necesario pa e boeinan existente por wordo mantene  y pone nobo den areanan menciona.

            E trabaonan, segun e minister por a compronde for di CEO di ATA, ta bay cuminza e siman aki mes, si tur cos cana bon. E proyecto aki ta hopi importante y e dignatario, aunke e proyecto a conoce tardanza, ta contento cu e ta bay cuminza e siman aki mes, y cu e lo garantiza e seguridad pa e landadornan local y turista cu ta haci uso di nos lama.

            Di parti di CEO di ATA, Ronella Croes, a menciona cu desde 2016 ATA ta un di e partnernan cu ta inverti den e boeinan, y esaki ta masha importante pa e usuarionan local y turista, y e ta dividi e areanan unda cu e personanan por landa di e areanan unda boto y vehiculonan por opera. E proyecto aki ta masha importante pa e landadornan, principalmente.  Aworaki e ta den un etapa unda ATA lo inverti den colocacion di boeinan nobo, pero tambe den trabaonan di reparacion cu ta necesario.

            E trabaonan ta cuminza e siman aki y tin un duracion di mas of menos, seis siman. El a reitera cu e areanan ta Arashi, Tres Trapi, Palm Beach y Costa Linda. 

            Ronella Croes a indica cu pa 2022 ya caba ATA tin e presupuesto necesario pa mantene e boeinan y esaki ta aspectonan hopi importante y ta den conformidad cu proyectonan den nos playanan. E dama a subraya cu ATA ta contento cu por a yega na e fase aki.