Mundo ta sigui lucha pa limita e progreso di calor y su peliger --- *Scrap uzo di carbon y proteha selvanan mester ta realidad 2030 --- *Hulanda ta laga decision clave na e proximo Gobierno Hulandes
ORANJESTAD(AAN)—Siglo 20 tabata e siglo di industrialisacion y di cambionan dramatico den bida di hende.
Si e minanan di carbon tabata motibo di exigencia pa leynan social y di trabou, desaroyo tecnico a entrega gas y petroleo e poder financiero y economico mundial.
Jetnan a conkista espacio aereo y a yuda desaroyo economico sigur pa loke ta trata turismo, cu a bira uno di e fuentenan di entrada mas importante na mundo y sigur pa paisnan den desaroyo.
E siman aki e poder di combustibel pa produci energia, tabata topico di e encuentro mundial riba clima.
Dirigentenan mundial a sinta na mesa pa trata di yega na acuerdonan, cu a wordo honra pa un cantidad grandi di pais pero cu no a topa cu aceptacion di e productornan mundial grandi Rusia, China, India, entre otro.
Hulanda tambe no a mara su mes na decisionnan clave cu a wordo tuma ya cu e representacion Hulandes a mustra cu ta na e Gobierno nobo di e pais pa mara futuro di Hulanda na e condicionnan serio cu ta bini dilanti.
Pa publico, e encuentro di dirigentenan mundial na Glasgow, ta parce un asunto pa dirigentenan.
Lamentablemente e asunto di clima no ta capta atencion necesario di publico, aunke cientificamente a wordo proba cu falta di medidanan den uzo di combustibel pa produci energia, tabata devastador pa hende.
Dokternan di pulmon tabata pertenece na e prome grupo cu tabata splica kico contaminacion di e aire cu hende mester pa por respira, a nifica pa salud di hende cu entre otro a bira pashent di cancer.
Awe cu mundo ta sinta na mesa pa papia di clima, ta bay mas leu cu solamente salud di hende pero ta atende cu e futuro existencia di mundo manera hende conoce actualmente. Ta papia awe di islanan cu por desaparece ora nivel di lama subi debi.
Ora pone tur aspecto hunto, ta mira con industrialisacion na Siglo 20, a haci hende rico pero a conoce diferente factor cu hende a nenga di discuti.
Asuntonan cu hasta ta afecta produccion di cuminda cu ta alimenta hende.
Mester yega na solucionnan pa e resultado di petroleo, gas y carbon como combustibel. Pero mester yega na un solucion tambe pa limita e peligro produci pa cria di bestia, cu hende ta come.
Na Hulanda campesinonan a protesta na hopi ocasion pa medidanan cu mester wordo tuma den e produccion di “mest” dor di baca.
E baca, e cabrito y tur e animalnan cu hende ta come, tambe ta come y loke como resultado di cuminda nan ta depone riba suela, tambe ta afecta clima.
Contiminacion industrial ta afecta cosecha cu yobidanan cu ta contene particulonan peligroso y temperaturanan mas halto cu ta destrui cosecha.
Produccion di lama pa entrega pisca na hende, tambe ta na peliger.
Cu clima a cambia, tur hende ta ripara. Pero ningun hende kier kere, cu e beachnan bunita di Aruba tambe ta na peliger.
Dirigentenan mundial a papia y un cantidad di pais a uni den medidanan. Carbon ta prome riba lista pa wordo gescrap na 2030.
Lo bay traha riba e proteccion di selvanan y Brazil ta entre e paisnan cu lo yuda proteha y promove selva, cu ta pulmon di mundo ya cu mata ta produci e oxigeno cu pulmon humano mester.
Mundo ta drenta un epoca nobo. Por bisa, cu mundo ta cera awor capitulonan cu a cuminsa cu Siglo 20, cu a trece cambionan dramatico pa mundo.
Pero hende ta comprende su berdad? Hende ta na haltura cu e baca y cabrito tambe ta produci un peliger den e totalidad di cambio di clima?
Finalmente, hende ta realisa cu e cantidad di hende na mundo a crece y ta sigui crece y ta exigi mas y mas di naturalesa cu hende mester mantene pa hende sobrevivi?
Cambionan grandi ta na caminda pa mundo, cu awe mester defini kico e ta haci cu herencia di ayera pa por confronta futuro!
