Trabao di basha asfalt a cuminsa riba caminda di Palm Beach

Tin un luz na fin di e tunnel

ORANJESTAD (AAN): Manera cu DIARIO a trece dilanti, e siman aki DOW a keda cla di frees e famoso caminda di Palm Beach net dilanti Citgo Service Station, pa asina e asina yama ‘Proyecto RWA’ yega su fin.

   Aki por mira cu ya caba e prome capanan di asfalt a wordo poni riba e caminda.  DOW a indica cu e trabao di asfaltamento lo dura 3 dia, y despues di esey tur cos lo ta cla, y nan por sigui cu otro fasenan.

   Manera por corda, varios luna pasa a cuminza cu e trabao pa drecha e drenahe banda di Citgo Palm Beach, y asina a bin topa cu hopi sorpresa y contratiempo ora a cuminza coba.

   DOW a indica cu e trabao aki tabata dividi den 3 Fase.  Pero nan a keda pega na Fase #1, cu ta encera mehoramento di e drenahe dilanti Citgo Palm Beach, y renoba e asfalt for di Citgo Palm Beach te cu Botica Santa Anna.

   Awe Diabierna ta exactamente 7 luna (27 Maart 2023) cu a cuminza cu e proyecto.  E prome fase mester a keda cla den 35 dia di trabao, y ta dividi den 3 seccion cu ta como lo siguiente. Seccion 1 ta coba pa pone tubo bao di caminda, haci trabaonan di concreto y conecta e drenahe na e baki di Palm Beach Condos.  Seccion 2 ta Frees (kita) e capa di asfalt for di Citgo Palm Beach te cu Botica Santa Ana.  Seccion 3 ta pone un capa nobo di asfalt.

   Fase 2: ta encera: Amplia e capacidad di awa y structura e muraya di e duiker na e crusada di e tanki na Palm Beach.  Fase 3: Amplia e capacidad di e duiker na Keito.  Fase 4: Asfalta y mehora e fluho di awa na e caminda di tera na altura di Palm Beach 94-B.

   Retraso: Pues un trabao di 35 dia a dura awor 7 luna caba.  Tur esey ta debi cu nan a experiencia retraso. Durante e construccion tabata tin 2 retraso unda cu e prome retraso a surgi ora e coba e sleuf pa instala e tuberia nobo y a bin topa cu kabel- y tuberianan imprevisto cu e resulta daña y DOW mester a drecha nan prome cu a sigui. Durante e proceso akinan tambe a ahusta e diseño pa evita cu e kabel- y tuberianan imprevisto akinan keda stroba.

   E di dos retraso a resulta di ta e contratista principal cu a worde afecta door di su mesun proyectonan cu e tin den ehecucion pa cual a resulta den problema temporal di logistica y financiero. Mientrastanto e problema di e contratista a worde resolvi y e reanuda trabaonan riba Mei 2023 na Palm Beach.

   Comienso di Juni, e contratista a sigui pa amplia e capacidad di drenahe y despues ceranan pa asina automobilistanan por yega na Citgo Palm Beach y e otro negoshinan.

   Asina e contratista mester a sloop di e tapadera di e duiker cu ta den acera. Esey a bay poco-poco debi cu tin kabelnan di voltahe halto (12kva) cu ta core den mantelbuis net bow di e tapa.  Tambe riba e tapa den e acera tin kabelnan fiberoptic di Setar NV y mas kabel di NV Elmar y Setar NV pa cual tin di traha cu hopi cuatela pa no dal esaki nan.

   Banda di e trabao di sloop e tapadera den acera cu cautela, a constata cu ora a kita e tapadera den caminda, e piso y e muraya tabata den hopi mal estado. Tambe a constata cu comerciantenan a conecta awa di riool, vet y awa di wasbak den e bakprofiel cu DOW mester atende cune pa coregi esaki pa evita cu ta sigui contamina medio ambiente. Esaki ta resulta den otro retraso.

   Por conclui cu e scope di e trabao den Fase 1 a bira mas grandi cu consecuencia ya conoci.  Pero awor di berdad tin luz na final di e tunnel.