Luenne Gomes-Pieters, directora di Impuesto:
*Mester busca un manera pa haci’e mucho mas eficiente
ORANJESTAD (AAN) – Directora di Departamento di Impuesto, Luenne Gomes-Pieters, a indica den entrevista cu DIARIO, cu el a wak den otorgamento di plachi cu otro aña no tin plach'i number nobo, pero pa aña 2025 si, e ta riba presupuesto.
“Nos ta ripara tambe den practica, cu e persona ta bin paga su impuesto riba vehiculo di motor, e ta bin busca cu plach'i number, su seguro ta valido ainda pa un luna. Nos no por para e contribuyente ey tampoco; kiermen, nos sa cu e ta bay cu su plach'i number, el a paga su impuesto di vehiculo di motor, pero aki un luna su seguro ta caduca, y nos no por garantiza cu e ta bay renova e seguro”, Gomes-Pieters a señala.
El a subraya cu e seguro mester ta valido segun e impuesto tambe ta core. Kiermen, si bo ta paga impuesto 31 di Januari, pa prome mitad di aña impuesto mester ta paga, y mester tin un cambio den ley cu ta bisa cu e prome mitad di aña bo auto mester ta asegura.
“Anto si pa e di dos mitad di aña, dia 30 di Juni mester paga e di dos mitad di impuesto di vehiculo di motor, pa e di dos mitad di aña tambe mester tin un seguro cu ta cubri bo auto”, directora di DIMP a remarca.
Gomes-Pieters a reitera cu DIMP lo mester cambia e ley di vehiculo di motor, cu ta “stap af” na momento di otorga e plach'i number, pasobra e no ta kere cu otorgamento di plach'i number ta e “core business” di Departamento di Impuesto.
“Nos departamento ta completamente plat momento cu nos tin cu bay otorga e plachinan, pasobra ta prome cu 31 di Januari nos tin cu otorga 89 mil plachi, cu nos ta bayendo caba. Den dos luna, bo por bisa, practicamente pasobra si e plachinan ta yega na November, nos tin cu controla e container, nos tin cu revisa nan si e plachi grandi y e plachi chikito tey, pasobra tin biaha bo ta hay un y e otro no, haci no control stiwa tur cos y anuncia cu e contribuyente por busca su plachi number”, Gomes-Pieter a subraya.
“Fuera di esey e paramento den rij, hendenan cu ta bira malo, esnan cu ta cay flow pasobra no a come bon mainta, bin para 5’or di marduga, bringamento den rij pasobra un ta bisa cu e ta prome, otro ta bin corta e liña, kiermen nos ta wak e proceso aki, mi ta bisa ‘nos mester por haci’e miho’. Mester tin un manera mucho mas eficiente pa por otorga e plach'i numbernan”, Luenne Gomes-Pieters a recalca.
