Trabao admirabel di Brighter Future Academy a wordo presenta cerca Ministro Gerlien Croes

ORANJESTAD (AAN): Manera ta conoci, e fundacion local ‘Brighter Future Academy Foundation’ ta dedica pa mehora e calidad di bida pa muchanan y famianan cu ta atende dificultadnan rond di autismo,

tambe cu asunto di ADHD y ADD, incluyendo sindrome di Down, retrazonan di desaroyo, y otro retonan di comportamento.  Nan ta suministra terapia y educacion cu ta centra riba e mucha y su famia, pa bin cu solucionnan fuerte y excepcional pa nan.

   E fundacion su meta principal ta dedica pa mehora e calidad en general di e hobennan, y yuda tur mucha bay dilanti.

   Brighter Future Academy Foundation a wordo funda na September 2022.  E directiva ta bao direccion di president Uleike Tromp, y el a uni cu otro profesional pa a landa e Fundacion.

   Tromp recien a haci un bishita di cortesia cerca Ministro di Enseñanza, Gerlien Croes pa duna un splicacion riba nan trabao y e metanan cu nan tin nan dilanti.

   Como un ‘Behavior Therapist’, señora Tromp tin como 18 aña di experiencia dunando terapia y guia pa muchanan special.  Y a splica cu nan ta atende di muchanan di 4 te 12 aña, y cu e klasnan ta chikito di 5 mucha, unda cada studiante por haya tur e atencion necesario.