Minister Mervin Wyatt-Ras
- Estudio di 2010 a divulga cu 10% di poblacion tin problema cu adiccion
ORANJESTAD (AAN): Minister di Salubridad, Asunto Social, Cuido di Adulto Mayor y Maneho di Adiccion, drs. Mervin Wyatt-Ras tawata presente na e accion den Caya Grandi pa hunto cu KPA, City Inspector y Stichting HUNTO atende cu e situacion di adictonan ambulante cu ta causando molester dilanti algun negoshi, den e caso specifico aki, dilanti di ex RBC.
E titular a salubridad y cuido a expresa cu ta deliberando pa na e miho forma atende cu e situacion aki hunto cu e diferente facilidadnan cu ta atende cu situacionnan di adictonan. Actualmente, e structura ta cay bou di Stichting HUNTO y Gobierno tin deliberacionnan cu nan pa loke trata e adictonan ambulante.
E problematica di adiccion, e minister ta menciona, ta creciendo na Aruba. A haci varios estudio den pasado y na aña 2010 a sali afo di esnan cu nan a entrevista, cu un 10 porciento di nos poblacion tin adiccion y e cantidad te cu awo a sigui subi. Di esaki, e adictonan ambulatorio ta esunnan cu mas ta ripara, mientras cu den hogarnan tambe tin hopi hende cu ta adicto. Hopi placa di mayornan ta bay na droga haciendo asina cu placa no ta yega.
E titular di Asuntonan Social a remarca cu tin palabracionnan cu Stichting HUNTO pa encontra cu adictonan ambulante pa asina intercambia cu nan y a base boluntario logra pa nan acudi na e inloophuis pa baña, come y wordo atendi prome cu nan bay bek den e situacion cu nan ta, esta riba caya. E intencion si ta pa motiva e adictonan aki pa busca yudansa.
Varios di e adictonan aki ta dificil pa motiva pa motibo cu nan tin problemanan psicologico y psikiatrico door di e consumo di droganan hopi fuerte. Esaki ta un motibo cu e problema di salud mental ta bira mas grandi.
“Lo sigui delibera y traha riba e situacionnan cu ta presenta y e molester y mal bista cu e adictonan ambulante ta trece especialmente den Caya Grandi. E personanan aki ta keda ser humano y nan mester haya e tratamento necesario pa nan bolbe funciona den nos comunidad liber di adiccion”, Minister Wyatt-Ras a expresa.
