ORANJESTAD (AAN): Diamars merdia, tanto Gobierno cu Alto Comisario, y tambe director di compania Setar NV a anuncia comienzo di trabao pa e ‘Operations Command Center’ na Savaneta.
E lugar unda tur camera di seguridad instala rond di e isla, lo wordo analiza 24 ora pa dia. Segun analisis di Cuerpo Policial, crimen na Aruba a baha substancialmente, y esaki ta un gran parti danki na e tremendo trabao di e cadena hudicial y cameranan ya caba instala.
For di e perspectiva di husticia, e ta hopi importante pa ehecuta e tipo di proyectonan aki cu partnernan cu ta confiabel. Pues na momento cu a haci e escogencia di un partner den e diferente fasenan, y di e Operation Command Center, a scoge Setar N.V. como un partner di confianza.
Tin cameranan instala caba den area hotelero, banda di lama, e “hotzone”, y a inverti tambe den camaranan pa centro di ciudad di San Nicolas cual ta pega caba y dentro di poco lo bira operacional. Banda di esaki, a aproba tambe e camaranan cu ta bay worde pega na e 40 luganan strategico, pa asina por asisti Cuerpo Policial den combati criminalidad mas eficiente.
A base di esaki a anuncia e inicio di e trabaonan pa loke pronto lo bay bira e Operation Command Center na Savaneta, situa den e edificio di ex-Hulpbestuurskantoor. E localidad a worde scogi door di e comision di conseho, un comision cu ta conta cu expertonan di ambos sector priva y publico y lidera pa Cuerpo Policial.
E proyecto aki ta conta cu un inversion di alrededor di 700 mil Florin, mirando cu e edificio lo bay worde renoba y restaura por completo, pa por cumpli cu e exigencianan ambos di e operadornan cu lo worde ubica akinan como tambe e aspectonan di siguridad. E inversion aki lo ensera e parti di tecnologia entre otro tur e pantayanan y software cu ta necesario, mueble nobo, pero tambe e parti di mantencion pa e cinco añanan nos dilanti, pues tur loke ta ensera mantencion tambe lo worde cubri den cuadro di e proyecto aki.
