Secretario di Vereniging Rijscholen Aruba:
ORANJESTAD (AAN): Thomas Ruiz, Secretario di Vereniging Rijscholen Aruba (VRA) ta splica riba e tema Dienst Technische Inspecties (DTI), riba cual a haya hopi reaccion den e dianan aki.
El a splica cu algo cu ta contradictorio cu locual ta siña durante e curso di examen di rijbewijs ta cu ley ta bisa cu e 'keringskaart' ta dos aña pa uzo propio y un aña pa e otro vehiculonan. E ta puntra su mes con e pick-upnan na Aruba ta wordo duna un 'keuringskaart' pa un aña, si e pick-up aki ta wordo uza pa uzo propio of personal.
Ruiz a sigui bisa cu hopi hende ta uza un pick-up pa por ehempel pa uzo propio y no pa companianan. Si ta wordo uza pa compania ta ok pa e haya un aña. Pero ta algo contradictorio, a expresa.
A agrega cu si ta wak loke tin riba caminda, autonan cu ta wordo declara perdida total den accident y cu despues ta wordo drecha con cu ta y atrobe ta riba caminda. Tin cu revisa e leynan y wak si mester kita e vehiculonan aki for di caminda, por ehempel, pa evita cu nan ta wordo gekeur.
Segun Thomas Ruiz, tur e cosnan aki tin cu tene cuenta cu e parti di DTI. Pa loke ta e trailernan, mayoria di nan no tin atributo manera ley ta prescribi y e ora ta surgi e pregunta riba con e cosnan aki ta wordo mira den wowo di DTI.
Pesey tambe, e siman cu a pasa, VRA y tambe via e comision a manda un peticion na DTI pa por sinta na mesa y pa haya un rondleiding pa wak con e situacion ta y pa haya un idea riba con e procedura ta y tambe trece critica cu nan ta haya. Asina tiki tiki conhuntamente cu e stakeholdernan ta trahando pa un trafico sigur, e secretario di VRA a expresa.
