Gobierno a honra Chastity Kock-Hodge pa cu celebracion di  25 aña di su scol di moda y talento

ORANJESTAD  (AAN):  Diamars atardi, durante un reunion ameno cu e modelonan di The Chaz Model,

Prome Minister Evelyn Wever-Croes a tuma e oportunidad di extende un reconocimento na e directora sra. Chastity Kock-Hodge pa cu celebracion di su 25 aniversario di su scol di moda y talento, The Chaz Model & Talent School.

   Chastity (Chas), manera tur hende conoce, no ta un desconoci den e mundo di modelahe. Mirando cu modelahe semper tabata su pasion, el a dicidi na un edad relativamente hoben, di cuminsa duna les na nos muchanan. Awendia, The Chaz Modeling & Talent School ta un scol renombra, cu no solamente ta ofrece shownan local sino tambe ta manda su muchanan participa den diferente concurso y modelahe internacional, di cual ultimo añanan a logra varios titulo, incluyendo un recien evento na Orlando (Florida), unda e damanan hoben aki a conquista titulo.

   Prome Minister, den nomber di Gobierno di Aruba a otorga sra. Chastity Kock-Hodge cu un reconocemento di Excelencia pa su 25 aña di dedicacion, profesionalismo y dinamismo den e mundo di modelahe, canto y baile riba tereno nacional y internacional.