Minister Geoffrey Wever:
*Pronto nan lo wordo elimina for di tereno di Refineria di Aruba N.V.
ORANJESTAD (AAN): Gabinete AVP-FUTURO ta sigui tuma decisionnan strategico pa garantisa continuidad di servicio energetico, proteha e economia nacional y mantene stabilidad pa tur ciudadano. Den e contexto ey, Minister di Finansa, Asunto Economico y Sector Primario, Geoffrey Wever hunto cu Director Robert Henriquez a formalisa un acuerdo di prestamo cu Fuels Marketing & Supply Aruba N.V. (FMSA) pa un suma di Afl. 7 miyon, destina specificamente pa elimina e towernan industrial TOSI y MHI riba e tereno di Refineria di Aruba N.V. (RDA).
Conseho di Minister di Gabinete AVP-FUTURO e aproba pa den presupuesto aloca e suma aki y despues Minister Wever a wordo autoriza pa Parlamento di Aruba pa haci e prestamo aki.
E decision aki ta bay hopi mas leu cu un inversion den infrastructura di refineria. E towernan industrial ta den un estado cu ta representa un riesgo serio pa e operacionnan di RDA. Si nan no wordo elimina na tempo, tin un peligro real cu nan por cay den otro, cu por obstaculisa seriamente e sistema di suministro di combustibel cu Aruba ta depende riba dje pa genera electricidad. Esaki ta haci e proyecto un asunto di seguridad energetico nacional y un condicion indispensabel pa mantene nos economia funcionando.
Minister Geoffrey Wever a indica cu un gobierno responsabel mester actua proactivamente ora interesnan esencial di e pais ta den wega.
"Nos no por permiti cu Aruba ta confronta un situacion unda un riesgo industrial por afecta nos suministro di combustibel y, como consecuencia, nos produccion di energia. Seguridad energetico ta un fundeshi pa nos economia y pa calidad di bida di nos pueblo," Minister Wever a comenta.
Gobierno a constata cu RDA no tabata dispone di e recurso financiero necesario pa por financia e inversion urgente aki cu su propio medio. Sin intervencion di Gobierno, RDA lo mester recupera e costo di e inversion aki door di aumenta su groothandelsmarge. Eventualmente, esaki lo a resulta den prijsnan mas halto pa gasolin y diesel pa ciudadano y comerciante, cu posteriormente lo a sinti esaki den e costo di transporte, distribucion y finalmente den prijs di productonan y servicio na Aruba.
Door di tuma e decision pa financia e proyecto, Gobierno ta evita cu e costo di e inversion wordo transferi directamente na e consumidor. Esaki ta forma parti di e maneho consistente di Gabinete AVP-FUTURO pa proteha e poder di compra di nos ciudadanonan y limita presion inflacionario na un momento cu costo di bida internacionalmente ta sigui bou di presion.
"Cada decision financiero cu Gobierno ta tuma mester finalmente traduci den beneficio pa pueblo. Cu e acuerdo aki nos no solamente ta elimina un riesgo pa nos infrastructura energetico, pero nos ta evita cu e ciudadano ta termina pagando e costo via prijsnan mas halto. Asina nos ta proteha e poder di compra di cada famia Arubiano."
Diferente na un prestamo convencional, e acuerdo ta impone condicionnan rigoroso cu ta fortalece e posicion di Gobierno durante henter e periodo di financiamento. E inversion lo tuma luga solamente despues cu tur condicionnan tecnico y legal a wordo cumpli.
Ademas, Gobierno a retene e derecho pa, si e interes publico ta exigi esaki, converti e prestamo total of parcialmente den un inversion di capital den RDA. Esaki ta duna Pais Aruba un instrumento adicional pa proteha patrimonio publico y mantene control strategico riba e inversion.
Minister Wever a conclui cu e acuerdo ta representa exactamente e tipo di gobernacion cu Aruba mester: un gobierno cu ta actua prome cu e problema bira crisis, cu ta proteha placa publico y cu ta tuma decisionnan cu ta fortalece stabilidad economico y bienestar social.
"Bon gobernacion ta anticipa riesgo, proteha e interes general y tuma decisionnan cu ta beneficia Aruba, no solamente awe, pero tambe pa e siguiente generacionnan. Esaki ta un inversion den seguridad, stabilidad economico y confiansa den futuro di nos pais," minister Wever a termina bisando.
