ORANJESTAD (AAN): Despues cu famia di e sospechoso C.F.D. a duna nan declaracionnan dialuna tocante nan yiu cu tin seis luna cera na KIA,
diamars mainta famia di e victimanan a reacciona riba varios punto treci dilanti. Yiu di e victimanan cu a perde nan bida cruelmente na januari, señora Yhoelly Willems a reacciona riba e declaracion di banda di famia di e sospechoso, señor Matthew, kende a menciona cu e sospechoso no tin un abogado y a nenga su persona di tin abogado.
Sinembargo, señora Willems a remarca cu dia un di maart, un di e abogadonan defensor di e sospechoso, señor Illis, den un entrevista na e medio di prensa 24ora.com, a papia di e caso na unda hasta a pasa video di e accidente. Tambe riba 10 di april, Corte a trata e prome caso proforma na unda e sospechoso tawatin mas di un abogado na su defensa, segun e, te hasta tres abogado.
“Kico por a pasa cu awo e no tin niun abogado, mi no sa y mi no ta preocupa mi cabes mucho cu esey tampoco. Pero mi ta contento cu Ministerio Publico a saca un comunicado indicando cu e sospechoso tin derecho na un representacion legal y esaki mester ta garantisa dentro di marco di ley valido”, el a expresa.
Tambe, el a sigui bisa, cu señor Matthew a bisa cu ainda no tin un investigacion di berdad cu a ser haci. El a expresa cu ta increibel cu señor Matthew por ta refiriendo na e mesun caso aki. “Ami como yiu di e victimanan por bisa cu investigacionnan a ser haci riba e caso di Hit & Run aki y nos como famia semper a respeta y duna espacio na e investigacion pa asina crea niun clase di confusion den comunidad”, el a enfatisa.
Refiriendo na e declacionnan di mama di e sospechoso kende a bisa cu su yiu ta den trauma, señora Willems cu awa na wowo a puntra si e señora aki ta pensa riba e trauma cu su yiu a causa su persona. “Mi trauma di wak mi mama sin bida riba caminda faltando un pia y mi tata sin bida cu cabes habri”.
Tambe mama di e sospecho a papia di e welo cu ta malo na Hospital y tawata hopi pega cu e sospechoso y no por bishit’e. “Ami tin seis luna sin wak mi mama y nunca mas lo mi wak e na bida. Y mama di e sospechoso no por ni imagina e amor grandi y con pega ami tawata na mi mama. Y mi mama nunca a haya sa cu e lo bira wela y mi yiu nunca lo conoce mi mama”.
Sinembargo el a bisa, cu e mama di e sospechoso si por bishita su yiu na KIA y dun’e un brasa mientras cu su mama nunca lo comparti e alegria cu ne ora su yiu nace. E ta gradici su famia, su amistadnan y coleganan di trabou cu desde januari, ta un apoyo grandi den su bida pa e por sigui tur dia, mientras no ta facil pero e lo ta fuerte y sigui bay dilanti pa su yiu cu lo bin na mundo aki dos luna.
