Tourism Patrol Aruba tey pa asisti comunidad y turistanan den dia y anochi

Ben Figaroa, Chairperson AH&SF:

ORANJESTAD (AAN)—Señor Ben Figaroa, Chairperson AH&SF, a elabora riba e servicio cu Tourism Patrol Aruba ta brinda nos hende local y turistanan.

Den un entrevista cu DIARIO el a señala cu “TPA” ta un servicio pa comunidad di Aruba y nos bishitantenan turistico, pa provee seguridad den e areanan turistico manera Palm Beach, Eagle Beach, etc. “Nan ta trafica tur dia, nan ta cana riba pathway, riba nan bais tambe, y tin cu ta tur dia den solo. Nan no ta den auto cu airco, sino canando riba caminda y combersando cu tur e bishitantenan, tanto local como turista” Figaroa a menciona.

“Nan a yega di asisti den diferente situacion, localnan cu tin un of otro problema, ora nan ta bishitando nos area turistico, of un persona cu, por ta, a trapa riba algo na beach; nan ta yuda cu asistencia medico tambe, pasobra nan ta entrena  den prome auxilio, y si tin emergencia medico nan por takel esaki mientras tanto otro servicio lo por yega pa sigui yuda”, señor Figaroa a splica.

Figaroa a agrega cu aworaki nan ta bezig cu plan 2025 pa ehecuta esaki, caminda nan ta bay upgrade nan sistema di raporta tur e participantenan den Tourism Patrol Aruba. “Nan ta usando un app awo, cu nan ta registra tur e diferente casonan cu nan ta encontra. Nos ta analizando e datonan hunto, p’asina ey nos compronde na unda nos tin cu inverti un tiki mas, pa nos duna un miho asistencia”, Figaroa a añadi.

“Pero na e momento aki ta preferible yama 100. Nos ta keda central y via strand politie mes tin comunicacion directo cu nan. Y si nan mester ayudo di strand politie, yama nan direct, y nan ta den e area caba, mayoria di biaha; y, nan ta trahando hopi bon hunto, mi por bisa!”, Ben Figaroa a duna di conoce.

Tourism Patrol Aruba ta traha te 11’or di anochi, pa garantiza e trankilidad riba seguridad. “Mi kier acentua cu nan no ta polis, nan ta un compania di seguridad priva, y nan ta bon entrena, y den cuadro di esey nan tey pa asisti e comunidad den dia y den anochi.