ORANJESTAD (AAN): Tabata Diadomingo mainta pa 11:00 am, cu un unidad di Polis di Noord a ser manda na The Butterfly Farm pa un persona femenino cu a bira malo. E momento ey temperatura tabata como 32º Celsius.
Na yegada di Polis, nan a bin tende cu
Ambulans tambe ta na caminda. Polis a bin mira un dama hoben kende ta drumi riba un banki. E tabata hala rosea profundamente, pero no tabata reacciona riba comunicacion. Un colega di dje tabata na su banda ta wante.
E colega a splica cu e victima aki ta un Tourguide part-time. El a bisa cu como 15 minuut prome, e dama hoben tabata haciendo su trabao y diripiente el a indica cu e no ta sinti su mes bon. Despues e dama hoben a bay para na entrada di The Butterfly Farm, y aki el a sak den otro. Nan ta pensa cu como cu tabatin un calor sofocante e momento ey, kizas el a haya un heat stroke.
Despues di algun minuut, Ambulans a yega y nan a cuminza atende cu prome asistencia. Ora cu nan a stabilize bastante, e paramediconan a opta pa bay cu e victima rumbo pa Servicio di Emergencia na Hospital pa mas tratamento.
