ORANJESTAD (AAN): E ola di calor di ultimo dianan, tabatin hopi efecto no djis riba e ser humano, sino tambe riba e kabelnan di NV Elmar cu diripiente a haya nan demasiado “overloaded” ora cu tur hende ta cende nan airco pareu den oranan di
anochi.
Algun area a nota con coriente a sinti manera un ‘dip’ riba Diadomingo anochi. Esey a socede debi cu un area grandi di Aruba a perde electricidad.
Tabata Diadomingo pa 10:09 pm, cu coriente a bay den area di Santa Cruz, Tamarijn Sero Pita, Piedra Plat, Pavia, y vecindario. E storing aki a pone cu personal di NV Elmar a subi caya pa localiza e fayo.
Esaki tambe a dura mas di un ora, pero ora cu a localiza e fayo, a logra isola otro area y banda di 11:26 pm a pone un parti di Santa Cruz bek riba red di electricidad. Como 10 minuut despues, pues pa 11:36 pm a logra pone coriente bek na tur zona.
Sinembargo pa 12:24 am, pues ya caba riba Dialuna, ta un otro fayo a presenta y e biaha aki a benta coriente abao na e.o. parti di Oranjetsad, Playa Pabao, Bushiri, Ponton, Tanki Flip, y Tanki Leendert. Un biaha mas tecniconan di NV Elmar a bay pa busca e fayo, isola esaki, y duna coriente bek.
Atrobe a dura casi 1 ora. Pues pa 1:22 am, nan a pone coriente bek pa un parti di Tanki Leendert.
Pa 1:47 am, a logra duna coriente bek na tur area afecta. Pa e resto di marduga no a surgi ningun problema mas na Aruba.
