Tour Operator Uni ta sostene monitoring cu GPS pa tur UTV y 4x4 riba caminda di tera 

Proyecto piloto a start cu sosten di Setar NV

ORANJESTAD (AAN): Den fin di siman, e grupo cu ta yama nan mes ‘Tour Operator Uni’ a participa den un reunion na edificio Cocolishi cu staf di Minister di Infrastructura, Energia y Telecomunicacion, riba inciativa di ABC Tours.

   Den e reunion, e compania nacional di telecomunicacion Setar NV, a presenta un sistema di fleet management basa riba GPS, cu ta registra ruta, velocidad y entrada den areanan protegi.

   E reunion a transcuri den un ambiente hopi positivo. Setar a duna un splicacion di e ultimo avancenan y tendencianan den tecnologia di GPS.

   Dos dia prome, diaranson 14 october, Setar a presenta na e oficina principal di ABC Tours pa instala e promer unidad, como parti di un proyecto piloto pa evalua e sistema den practica y duna recomendacionnan pa su mehoramento.

   Marvin Kelly, Fundador y Managing Director di ABC Tours, a ricibi e representantenan di Setar NV, y e compania a confirma cu ABC Tours ta e promer tour operator cu a instala e plataforma di Setar NV.

   Gabriel de Mey, kende ta Operations Manager di ABC Tours, a representa Tour Operator Uni. ABC Tours ta uza GPS tracking desde cu e tecnologia a bira disponibel comercialmente na Aruba.  De Mey a splica con e sistema ta funciona den practica y e medidanan adicional cu ABC Tours semper a tuma proactivamente pa asegura cu su empleadonan ta sigui e reglanan existente.

   Basa riba e experiencia aki, de Mey a duna Setar feedback y recomendacionnan riba e informacion cu ta di mas balor pa operadornan. El a enfatisa tres punto: con ACF por haci uzo di e data, sin cu informacion comercial confidencial di e companianan ta keda expone; e periodo cu e data ta keda warda, pasobra un evaluacion serio di uzo di naturalesa ta rekeri data historico di mas aña; y precision di e sistema, pa evita alerta falso ora un vehiculo ta core cerca di un area restringi.

   Desde e inicio di e proceso aki, ABC Tours a comparti activamente su experiencia y conocemento practico cu e miembronan di Tour Operator Uni, cu e meta di yuda, fortifica e colaboracion y contribui na solucionnan cu ta beneficia henter e sector y nos naturalesa.

   “GPS ta duna data cu bo por verifica: unda un vehiculo a core y na cua velocidad. Cu esey bo por proteha naturalesa y controla cu tur hende ta cumpli cu e reglanan,” de Mey a bisa. “Pa esaki funciona, e mester ta e mesun regla pa tur UTV y 4x4 riba e caminda di tera: operador cu licencia, compania di renta y chofer priva.”

   Tour Operators Uni ta kere cu decisionnan riba acceso na e parti nort di Aruba mester ta basa riba data midi, no riba suposicion. Un registro di GPS ta mustra cua vehiculo ta uza cua caminda, ki ora y na cua velocidad. Esey ta duna Gobierno y ACF un base factual pa establece y controla reglanan riba e camindanan cu ta existi caba, en bez di cera nan pa tur hende.

   Den su Protocol di 28 september 2026 na Gobierno, Tour Operator Uni a propone cu cada vehiculo comercial di tour mester tin GPS funcionando prome cu e operacionnan bao di e protocol cuminsa. E principio ta cu cada usuario mester compronde y asumi su responsabilidad, y asina contribui positivamente na proteccion di nos naturalesa. Uni ta

dispuesto pa yuda operadornan mas chikito cu e implementacion.

   Tour Operator Uni ta pidi pa e rekisito ta un standard tecnico cla, habri pa cualkier sistema cu ta cumpli, cu reglanan cla riba ken ta doño di e data y ken por mir'e.

   Tour Operator Uni ta considera e pasonan aki como avancenan hopi positivo y ta agradeci atrobe e oportunidad pa nos industria aporta na un modelo di uzo responsable di naturalesa cu por sirbi como ehempel pa Caribe. Uni ta keda disponibel pa traha cu Gobierno y ACF riba un sistema di monitoreo cu ta funciona pa tur.