Total di 26 profesional di Departamento di Impuesto a gradua di Basisopleiding Belasting

Ministro Geoffrey Wever contento:

• Inversion den conocemento ta fortalece finansa publico y servicio na ciudadano 

ORANJESTAD (AAN): Recientemente Minister di Finansa, Asunto Economico y Sector Primario, mr. Geoffrey Wever, tabata presente na ceremonia oficial di graduacion di e Basisopleiding Belasting, un trayecto formativo intensivo dirigi na profesionalnan di Departamento di Impuesto.

   No menos cu 26 empleado a finalisa cu exito e programa cu a cuminsa na october 2024 y a conclui na December 2025. E graduadonan a sigui e opleiding tres biaha pa siman, despues di nan ora regular di trabao, demostrando un compromiso extraordinario cu profesionalisacion y mehoracion continuo.

   Den su discurso, Minister Wever a comparti su pasion pa e tema di derechonan fiscal y a subraya cu colecta di entradanan no ta solamente un mecanismo tecnico pa recauda fondo, sino un pilar fundamental pa sostene finansa publico solido y sostenibel.

   “Sistema fiscal di un pais ta basa riba confianza. Pa logra esaki, nos mester tin profesionalnan cu tin bon conocemento di ley, integridad, y un actitud humano y “service minded". Ë forma con nos ta comunica y atende cu e ciudadano ta mesun importante cu aplicacion corecto di ley,” asina Minister Wever a expresa.

   Minister Wever a enfatisa cu e rol di un fiscalista ta exigi mas cu solamente dominio tecnico. E ta exigi pasion pa e profesion, sensibilidad humano y capacidad pa aplica ley na un manera servicial.

  Minister Wever a subraya cu gobierno ta sigui inverti den mehoracion di proceso, incluyendo digitalisacion y sistema online, cu lo contribui na un maneho mas eficiente y transparente di impuesto. Segun Minister Wever, capacitacion continuo di personal ta esencial pa adapta cu e evolucion tecnologico y cambionan den regulacion fiscal.

   “Sigui educa y inverti den boso mes. Innovacion y modernisacion di Departamento di Impuesto ta depende directamente di e nivel di preparacion di nos profesionalnan. Inversion den conocemento ta inversion den futuro di Aruba,” Minister Wever a conclui.

   Minister Wever a expresa su gradicimento na Señora Luenne Gomez-Pieters y su team pa organiza e Basisopleiding Belasting.

   Cu e graduacion aki, Gobierno ta reafirma su compromiso cu fortalecemento institucional, profesionalisacion di servicio publico y consolidacion di un sistema fiscal moderno cu ta beneficia tur ciudadano di Aruba.