Meverly Romano, relacionista di DIMP:
ORANJESTAD (AAN): Encuanto e cumplimento di pago riba impuesto di auto, pa aña 2026, señora Romano a declara den entrevista cu DIARIO, cu e deadline pa pago di impuesto riba vehiculo di motor, a caba di pasa pa e prome mitad di aña.
“Cincuenta porciento di nos numbernan ta paga. Esaki ta 49.133 auto y nos ta wak cu 24% no a haci pago mes di aña 2026. Esaki ta un total di 23.704 number cu nada di aña 2026 ta paga. Y nos tin 25% cu a paga e mitad di aña, pues e personanan aki a cumpli. Kiermen, e total di cumplimento ta 75% di e impuesto di aña 2026; e incumplimento ta 24%, y 1% acerca ta e plachinan cu no ta bay wordo paga, pasobra ta personanan cu a entrega na numbernan bek, ya sea pa un tempo defini, of indefini”, señora Romano a trece dilanti.
Poniendo e situacion den su contexto, señora Romano a splica lo siguiente:
Di e cantidad di autonan cu DIMP tin registra, 24% no a paga nada di e impuesto di aña 2026, y esaki ta representa un cantidad di 23.704 vehiculo.
“23.704 vehiculo di motor, auto, bromer, truck en total lo ta coriendo aworaki riba nos camindanan publico, unda nan no tin e belasting di aña 2026 paga; y di e 24% aki e categoria mas grandi ta e plachi A, cu ta un cantidad di 19.831 vehiculo”, Romano a menciona.
“E categorianan cu ta resalta, cu no tin pago di impuesto di 2026 ta: A, 19.831 vehiculo. E trucknan di Diesel: 293, cu ta 23% di e trucknan cu ta riba caminda; 35% di e brommernan, cu ta un total di 1.232 cu nan number no ta paga pa 2026; plachinan di nomber, 32% no ta paga, esakinan ta e numbernan personaliza, y tambe e numbernan cu tin plachi T cu O. T mas tanto, 247 no ta paga, esaki ta 65% di e Tnan, cu nos tin registra cu tampoco tin pago riba nan. Nos tin e trucknan, Plachinan TR cu ta 28%, cu ta representa un cantidad di 23 truck. Trucknan di gasoline. Mi tin cu bisa cu e trucknan di diesel ta e cantidad mas halto. Y e V-Carnan, nos tin 23% cu no tin pago riba nan impuesto 2026, cu ta un cantidad di 1.486. Kiermen di tur e diferente categorianan nos tin 23.704 number cu no tin pago di impuesto 2026, riba nan.
