Total di 21 miembro dedica di Cuerpo di Bombero a ser honra cu un diploma pa diferente estudio completa

Francis Toussaint di Brandweer Aruba riba Dia di Bombero

ORANJESTAD (AAN): Durante e celebracion di Dia di Bombero dia 10 di October, 21 miembro dedica di Cuerpo di Bombero a ser honra cu un diploma pa e diferente estudio cu nan a completa ultimamente. E reconocimiento aki ta mustra cu Cuerpo di Bombero ta sigui inverti den e desaroyo y capacidad di su hendenan, sigurando un servicio semper mas prepara y eficiente.

   Señor Francis Toussaint di Brandweer Aruba a expresa cu Dia di Bombero ta un dia hopi special sinembargo, hopi biaha no ta tuma e dia aki cu e seriedad manera mester ta y no ta tene cuenta cu  bomberonan ta hinca nan bida den peliger pa scapa bida di otro of yuda un otro hende.

   “Esakinan ta e personanan cu ora nan sali for di nan cas pa bay traha, no sa si nan lo bolbe bek cas. P’esey mi ta gradici cada un di nos bomberonan pa nan empuhe y balentia y pa nan sigui eherce e trabou aki”, Señor Toussaint a expresa.

   Señor Toussaint a indica cu for di e 21 bomberonan cu a ricibi nan diploma, 12 Manschap A a pasa nan curso den un aña cu exito. Nan a bin for di otro sector cu no tabata sa nada di brandweer y ya tin un aña ta trahando y haciendo un bon trabou. Un otro grupo cu a ricibi nan diploma tawata e Bevelvoerders cu a ricibi un opleiding duna pa Hulanda cu originalmente mester tabata di un aña y mei pero ya den 5 luna nan a termina e curso aki. 9 bombero a pasa esaki cu exito y awe nan ta eherciendo e trabou di bevelvoerder.

   Esakinan ta e capitannan riba e trucknan di bombero y ta encarga cu e post, accident, candela na cas, y auto entre otro. Nan ta percura pa e siguridad di nan mes, di nan ekipo y di e publico y instancianan na e lugar di suceso.

   Matutino DIARIO ta felicita cuerpo di Bombero en general y ta gradici nan di curason pa tur e bon trabaonan cu cada un ta haci pa siguridad di nos tur.