Como 835 a tuma e prome dosis y 1851 a haya nan di dos dosis: - ORANJESTAD (AAN) – Diadomingo atardi, Minister Dangui Oduber, titular di Salud y Turismo, hunto cu Chris Goedhart, Medewerker na DVG,
a yama un conferencia di prensa, como clausura di e Vacunathon # 4, cu a tuma lugar na Ritz Carlton.
E mandatario a bisa cu, manera ta conoci, siman pasa gobierno a anuncia cu ta bay tin e Vacunathon # 4, pasobra ainda no a yega na e obhetivo cu Ministerio di Salud a pone pa su mes.
“Ora cu nos a cuminza cu e programa di vacunacion algun luna pasa, nos a pone como meta cu nos deseo ta pa yega na 85% di nos poblacion vacuna. Nos a hiba diferente campaña agresivo, pero no ta facil pa convence e grupo cu no ta kere den e vacuna of tin duda riba efectonan secundario cu e vacuna ta duna. Pero no obstante esey, esaki tabata e di cuater Vacunathon cu nos a organiza y mi tin cu bisa cu tambe el a resulta sumamente exitoso”, e dignatario a duna di conoce.
Cerando Diadomingo, despues di dos dia di Vacunathon, 835 persona a vacuna pa su prome shot, y 1851 cu a haya nan di dos dosis, Minister Danki Oduber a informa. Pues, un total di 2.686 ciudadano a acudi na e Vacunathon #4, pa haya nan prome y di dos dosis di Pfizer.
