Peligro cu jellyfish na Curaçao
WILLEMSTAD: Oficialnan di Salubridad Publico na Curaçao a tuma nota cu tabatin presencia di e jellyfish peligroso yama ‘Pechi Portugues’ na e beachnan conoci como Mambo Beach, Janthiel, y beachnan di Banda Abao.
Ministerio di Salud Publico a ricibi informacion di Huis Artsen Post Curaçao (HAP) cu un total di 13 persona a bay busca auxilio cerca nan cu heridanan di Pechi Portugues durante Diasabra y Diadomingo.
Esaki ta suficiente motibo pa bati alarma y avisa esnan cu ta bay no djis e beachnan aki, pero tambe na e beachnan banda zuid di e isla.
Nan ta splica cu ta e cambio di direccion di biento, of cambio di coriente di lama a trece un monton di jellyfish cu ta drif y yega costa.
Pechi Portugues ta relativamente facil pa mira den lama. Bo ta reconoce na su forma di un blas of saco di plastic biña yena cu aire di mas of menos 25 centimeter y ta drif den laman. Si bo mir’e, keda leu, pasobra su tentaculonan cu ta bao superficie di lama por rek y yega mas cu 15 meter.
Si acaso pa malasuerte bo bini den contacto cu su tentaculonan, kita restante di tentaculo cu keda riba bo cuero sin grawat’e, laba e cuero cu awa di laman y aplica awa lou riba e area afecta. Tambe por aplica vinager regular slap (1 pa 2 dopi den 2 liter di awa) riba e area afecta. Si e area afecta keda kima of haci dolor intenso, pone ijs riba dje y bishita bo Docter di Cas.
