Pierre Rafini, Presidente di ABA:
ORANJESTAD (AAN) – Pierre Rafini, Presidente di Aruba Bankers Association, den entrevista cu DIARIO a subraya cu likidez ta keda e “higher concern” di e banconan, pa nan sigui crece y duna fiansa.
“Un di e principal rolnan di Asociacion Bancario di Aruba, ta pa keda yuda sostene e crecemento economico di pais Aruba, pero sin likidez nos no por haci esaki. Esey ta un, di dos si wak bon tin un guera ‘going on’ na Medio Oriente, bo tin situacionnan cu ta di politica, den nos mesun region cu semper por ta un riesgo pa e region aki di Caribe, pero por hacie tambe di Aruba y p’esey e por afecta turismo, cu ta e pilar economico di Pais Aruba”, Pierre Rafini, a señala.
Rafini a menciona cu ta bay tin eleccion na Merca e aña aki, y cu economia Mericano ta mirando su bon momentonan, pero, naturalmente, despues di cada eleccion por bin cambio. “Y na Aruba semper nos ta bisa cu si na Merca nan mester haya un sneu, na Aruba nos ta haya e griep. Pues, na Aruba nos ta haya efecto. Esey ta e tres cosnan cu mi ta kere cu no ta tene nos lanta, pero nos ta hopi conciente di dje, mirando cu tur tin di haber cu e crecemento economico di e pais aki”, señor Pierre Rafini a comenta.
HABRI PA IDEANAN NOBO:
Pierre Rafini a indica cu tur e banconan ta habri pa ideanan nobo, manera negoshinan nobo cu empresarionan hoben kier lanta. Pero nan ta bay bek riba un “business plan” si e ta uno factible, y na final di dia si e banco ta duna e persona aki un prestamo di 10 mil, 20 mil of 30 mil florin mes, si e ta bay pa dos, cinco, diez of mas aña, e cifranan mester mustra cu e negoshi por paga esaki, durante e periodo cu e fianza a wordo duna.
“Si e ta mustra esey, mi ta kere cu e banconan no tin ningun problema pa duna e financiamento”, Rafini a señala. A puntra señor Rafini si tin hopi hoben cu kier lanta un negoshi, por ehemplo di tecnologia digital, etc., cu ta acerca e banconan pa un fianza.
Segun Pierre Rafini, hopi hende ta pensa cu e banconan no ta mucho habri pa esaki, por ta p’esey no tin hopi peticion, pero e aplicacionnan cu e banconan ta wak, en general no tin dje tanto peticion ey, pa cualkier tipo di negoshi cu ta ofrece tecnologia of E-commerce, etc. El a reitera si, cu si e business plan ta bon, y ta factible, banco ta habri pa duna financiamento.
