No ta spera e desaroyo di ciclonnan tropical a corto plazo
ORANJESTAD (AAN): E Tormenta 'Bonnie' a provoca awaceronan pisa na Nicaragua y Costa Rica, pero e efecto di e mal tempo aki tambe a wordo sinti na El Salvador y a causa inundacion y dañonan den e pais centroamericano aki, y incluso un fayecimento.
Riba potret por mira algun di e imagennan impactante relaciona cu e afectacion di e mal tempo den Costa Rica y Nicaragua. Unda cu a pesar cu e tormenta no a alcansa e categoria di horcan, el a trece hopi daño material pa motibo di e inundacionnan.
E sistema a atravesa America Central y a bira mas fuerte riba Pacifico Oriental.
E onda tropical, cu tabata den Caribe diabierna, y cu a pasa pazuid di e islanan ABC, durante e fin di siman a provoca biento fuerte, ademas di un sensacion di calor como di tambe algun awacero isola.
E condicion aki a trece cu ne biento, ya cu por bisa cu awor nos ta ubica den e parti patras di e onda tropical.
Na Puerto Rico, por ehempel e esaki a provoca awaceronan riba diasabra como tambe na Republica Dominicana y Haiti, unda tabata tin bientonan cu forsa di tormenta tropical den rafaganan.
Por bisa cu riba diadomingo, riba Atlantico tabata tin trankilidad, no tin mas ciclon tropical activo. Colin a disparce y Bonnie ta activo riba Pacifico Oriental. Tampoco tin areanan pa observa den e proximo dianan y no ta spera e desaroyo di ciclonnan tropical a corto plazo, segun Caribbean Weather Channel.
Por bisa cu na Aruba, apesar di e pronosticonan cu tabata menciona cu e mal tempo lo a pasa riba e isla, esaki a pasa cu un efecto hopi leve. Manera nan sa bisa, danki Dios cu e no a afecta Aruba y e region manera si a sosode na otro paisnan den becindario.
Di tur manera, semper mester ta prepara, pasobra naturalesa no ta haci wega!
Potretnan cortesia di Caribbean Weather Channel y di contactonan local.
https://diario.aw/categories/noticia/general/tormenta-bonnie-a-causa-inundacionnan-y-danonan-na-costa-rica-y-nicaragua#sigProIdb9deb7bdf3
