MIAMI: Riba Diasabra, e actriz mexicano Susana Dosamantes, kende ta mama di Paulina Rubia, a fayece na un Hospital na parti zuid di Florida. E tabata luchando contra cancer di pancreas.
“Cu curazon den man y cu dolor profundo mi kier informa boso cu mi mama, e bella Susana Dosamantes, awe ta cuminza un ciclo nobo, den paz total y rondona pa su famia. Mi ehemplo di bida, un ser di luz, un muher fuerte, awe ta pasa pa bida eterno.” Esey ta loke Paulina Rubio a indica riba su Instagram.
“Nos ta gradici enormemente e Docternan, enfermeranan, y tur personal di Hospital pa cuida profesionalmente mi angel. Nos ta agradeci boso comprension y respet na emomento asina dificil aki. Nos ta pidi privacidad pa famia y amigonan.”
Maria del Perpetuo Socorro Guadalupe Susana Dosamantes Rul Riestra ta e nomber completo di e actriz, y den su 74 aña el a debuta na varios ocasion riba pantayanan latino via di novela, obranan teatral, y pelicula.
Dosamantes a nace na Guadalajara dia 9 di Januari 1948, a cuminza su carera artistico den cine. Su prome papel tabata e pelicula ‘Remolino de Pasiones’ (1968) y despues a pasa pa actua den 28 pelicula di pantaya grandi, incluyendo ‘Rio Lobo’ (1970) actuando hunto cu John Wayne.
Pero toch su rolnan mas reconoci tabata den telenovelanan. E tabata asina parti di e historia di e gigante mexicano Televisa for di 1971 ora cu el a haya un rol den e version original di ‘Muchaha Italiana viene a casarse”. Na 1977 el a cuminza destaca cu su rol den e telenovela iconico ‘Corazón Salvaje’. Su rol mas recien tabata di Tita, viuda di Montiel den e produccion ‘Si Nos Dejan’ (2021).
Pero e mes a bisa cu ningun rol a dune “mas felicidad” di ta mama y wela, y cu e tabata riba Red Carpet di ‘Premio Lo Nuestro’ na Miami na Februari cu a pasa, acompañando su yiu Paulina Rubio, kende a wordo reconoci pa su 30 aña di carera.
