Frans Ponson, presidente di CUA:
*Pa sinta hunto diseña un plan pasobra Arubianonan no ta hayando cas!
ORANJESTAD (AAN)— Frans Ponson, Presidente di Comerciantenan Uni Aruba (CUA) a bisa den conferencia di prensa, cu el a trece e preocupacion tocante e problema di vivienda pa hendenan local, cu ta biba den pueblo y ta comparti pa CUA, na atencion di FCCA, banconan, Asociacionnan, Gremionan, Gobierno, pa nan tur sinta hunto y diseña un plan pasobra e Arubiano, no ta hayando cas.
“Nos ta mencione aworaki. Cu Comerciantenan tin un solucion? NO. nos no tin e solucion. Cu nos ta bay tin un solucion aki un aña? No. Pero si nos no tin un solucion, aki diez pa diescinco aña mi ta garantiza boso cu nos tur ta bay biba den hoekinan traha door di gobierno y nos ni un, ta bay tin un tereno. Pasobra mi kier a enfatiza, pa ni no papia pa ningun otro hende, pa mi papia riba mi mes, cu tereno erfpacht ta tereno di gobierno, destina pa pueblo biba aden. Pero, pa nos no menciona otro hende, cualkier Arubiano cu tin un cas awe, y e por bende pa 600.000, pero e ta haya un stranhero cu por pag’e 3 miyon, e ta bay bend’e. Nos tur ta humano y nos tur kier e placa ey” Frans Ponson a enfatiza. No obstante, el a reitera cu tereno erfpacht ta pa pueblo di Aruba.
El a subraya cu solucion CUA no tin, y si tur tereno erfpach y eigendom ta wordo bendi cu hende internacional y nos no a atende cu ne, aki dies, diescinco aña e ta bay puntra henter e pueblo aki si e ta corda ora el a trece dilanti e topico aki.
“Nos tin cu atend’e cu ne aworaki pasobra Aruba si no tin tereno cu nos por move bay den un seccion barata. Nos no tin extension na Aruba, nos terenonan ta limita, nos tin un tiki tereno ta dunando nos pueblo, pero no ta un secreto cu no ta di nos localnan mas. Y pronto nos tin cu biba den casnan cu gobierno ta traha pa nos, di dos pa tres meter, pasobra nos no por paga e prijs actual” Frans Ponson a señala.
Finalmente, el a splica cu awe mayoria di doñonan di negoshi ta bisa cu tin hopi preocupacion bao nan trahadornan, pasobra nan no por yega na un cas. “Problemanan social, tin hopi tension, nan tampoco ta aportando bon, awo tur hende den cas ta trahando (incluyendo yiu). E ta un problema cu nos tin cu atende y e ta yega te na pia di trabao, y nos ta wak e.
Tin empleadonan cu ta yora cerca bo pasobra nan kier yega na un cas y bo como doño di trabao kier yuda, pero bo no por yega yuda na tur bo empleadonan. E ta imposible!” Presidente di CUA, Frans Ponson a remarca.
