Frontier Airlines ta lansa vuelo nonstop entre Atlanta y Aruba
ORANJESTAD (AAN): Aruba Airport Authority N.V. (AAA) ta contento di anuncia e yegada exitoso di Frontier Airlines su vuelo inaugural for di Atlanta (ATL) pa Aruba (AUA) riba diasabra, 24 di mei 2025. E conexion directo nobo ta introduci un opcion di biahe conveniente y na bon prijs pa e comunidad di Aruba.
E lansamento di e servicio di Atlanta ta marca e regreso di Frontier Airlines na Aruba, despues di su operacion anterior for di Miami na aña 2021. E presencia renoba aki ta complementa e conexion existente di Atlanta dos biaha pa dia ofreci pa Delta Air Lines y ta provee e Rubianonan cu opcion adicional pa conecta cu otro stadnan di Merca a traves di e rednan domestico di Frontier, incluyendo Cleveland, Washington D.C., Philadelphia y Chicago.
Un bista clave di e mercado
Na aña 2024, Aeropuerto di Aruba a ricibi un total di 1.11 miyon pasahero cu ta genera entrada na Merca, cu 7% ta origina for di Atlanta. Te cu luna di maart di e aña aki, Aruba a yama bonbini na 306.000 pasahero Mericano cu ta genera entrada, cu 9% ta origina for di e mercado di Atlanta, reflehando e importancia creciente di Atlanta como un porta pa e biaheronan pa Aruba.
E ruta nobo ta ofrece servicio semanal riba diasabra te cu luna di augustus, brindando e Rubianonan acceso directo na Atlanta, un centro grandi cu conexionnan domestico y internacional extenso.
“E demanda pa aerolineanan bin Aruba ta sigui hopi halto”, asina mr. Wendrick Cicilia, Minister di Turismo y Labor, a duna di conoce na ocasion di e prome vuelo di Frontier. “Como destinacion nos ta garantisando un bon balansa entre crecemento di cantidad pa calidad. Hopi isla den Caribe ta uzando e modelo di Aruba awo como un ehempel. Y e vuelo di Frontier awor ta demostra e interes di pasaheronan cu ta prefera Aruba riba tur otro destinacion den Caribe. Y pa esey nos ta hopi orguyoso”.
“Nos ta contento di lansa e servicio aki na AUA, ofreciendo biahe nonstop na bon prijs for di e continente di Merca pa e bunita paraiso cu ta Aruba”, asina Josh Flyr, vice presidente di network and operations design di Frontier Airlines a menciona. Flyer a continua bisando cu: “E ruta nobo aki ta un victoria pa tanto e turistanan cu ta buscando pa explora e isla como tambe pa e localnan cu ta biaha pa Atlanta of cualkier otro destinacion cu nos ta ofrece.”
“Nos ta orguyoso di yama Frontier Airlines bonbini bek na Aruba”, asina Jo-Anne Arends, Aviation Business Development Executive na AAA, a expresa. E ehecutivo a continua bisando cu: “E ruta nobo ta mehora ainda mas nos conexion cu e zuidoost di Merca y mas aleu, ofreciendo e comunidad local opcionnan mas flexibel. Ademas, e ta respalda nos esfuersonan continuo pa diversifica e servicio aereo y expande e alcance di Aruba na mercadonan nobo”.
Ademas di beneficia e biaheronan local, e servicio ta introduci Aruba na un segmento mas amplio di e bishitantenan Mericano for di e region di Atlanta y ta sostene crecemento continuo den e sector turistico di e isla.
Schedule di vuelo
Frecuencia: Un biaha pa siman riba diasabra so (te augustus).
Saliendo for di Atlanta (ATL): 10:13 AM → yegando Aruba (AUA): 2:20 PM.
Saliendo for di Aruba (AUA): 3:35 PM → yegando Atlanta (ATL): 7:55 PM.
E servicio aki ta opera cu un avion Airbus A321, cu ta conta cu un capacidad di asiento pa 230 pasahero. E ruta di temporada aki lo brinda 230 asiento adicional pa siman entre Atlanta y Aruba, impulsando e capacidad durante e periodo di biahe di mas halto di nos isla.
