ORANJESTAD (AAN): Riba Dialuna, e lider di e grupo di carnaval TOB cu a ricibi avalancha di critica relaciona cu loke a pasa durante Parada di Flambeu, a duna su reaccion.
Manera ta conoci, tin varios participante di Parada di Flambeu cu a bay den
grupo di TOB, cu na final di e evento a keda sin por a usa sikiera 1 carchi pa haya bebida. Y tur esey debi cu e servicio di Bar riba e ruta durante e actividad, tabata un berdadero caos y un mal experiencia pa hopi participante.
Varios participante pa e motibo ey a hasta sali for di Parada caba den Vondellaan na Playa.
E lider, Lisette Chung a acudi na e programa di radio di Ivo Yanez, unda el a ofrece un disculpa publico na e participantenan.
Nan ta kere cu e problema a presenta, for di tempo cu nan a bin haya sorpresa cu e agencia importador no tin suficiente cerbez den bleki den stock. Como cu na Aruba no por tin cerbez na boter den ruta, esey a pone cu mester a busca un alternativo.
Asina a wordo duna e alternativa pa bin cu cerbez den sifon. Pero esaki a bay mas slow cu normal. Envez di djis gara bleki di cerbez y duna e participante, ata e bartender tin di busca forma pa habri e tumbler, cuminza yena esaki, y despues pone e tapadera y entrege bek. Tur esey ta tardanza. Tabatin momento cu ora di cambia sifon, cu esaki ta produci hopi foam.
TOB Group den pasado a yega di bay cu mucho mas participante, y esaki a draai semper bon sin problema.
Chung a admiti cu e biaha aki nan tabatin un crew nobo di Bartenders cu a bay pa sirbi publico, cu no tabata costumbra pa atende asina hopi hende.
E lider di TOB a priminti cu pa siguiente parada, nan lo bay fix tur e obstaculonan cu a topa cune den Parada di Flambeu.
