Tire ta un artefacto ideal pa broeimento di sangura:

Director di GKMB Luis Chong:

Hopi club, entre otro, ta uzando tire pa cera tereno ocasionando problema di sangura 

ORANJESTAD (AAN) – Den entrevista cu señor Luis Chong, director di Gele Koorts Muskieten Bestrijding (GKMB), el a splica cu hopi club y veld ta usando tire di auto, pa cera tereno, pero e problema ta sangura.

            Chong a señala cu no solamente na casnan, pero hopi hende ta prefera di no paga e cinco florin pa e tire-shops yuda nan deshaci di e tire, y nan ta bin cas cu e tirenan, e no sa pa ki motibo

Na casnan e tirenan ta warda den cura, y esaki ta crea problema di sangura sigur pa e casnan. Tire ta un di e artefactonan mas ideal pa sangura broei aden.

            “E ta scur, e ta preto, e ta cayente, e ta ideal pa sangura. No solamente esey, ultimo tempo tambe nos a ripara cu hopi club deportivo, centronan di bario, y otro lugarnan cu hende ta topa otro den actividadnan, a cuminza uza tire pa un of otro motibo. Mi ta ripara cu ta uza tire pa demarca liña di veld, centronan di bario ta use enberdad, pa muchanan hunga, of marca tereno tambe. Si e tirenan aki no ta wordo bon prepara pa esaki, e ta bay trece un problema di sangura den un tereno unda bo ta invitando mucha, por ta hende grandi, fiesta, etc., “director di GKMB a splica.

            El a bisa cu e tirenan aki mester wordo bora, pa evita cu nan haya awa den nan. El a subraya cu, eigenlijk, preferiblemente, pa no tin tire den un tereno habri, pasobra si tin cantidad grandi, con ta bora nan?

            “E tirenan por wordo yena cu tera, pero awa no por bin den dje, pasobra un bez cu awa ta para den dje bo por haya problema. O bo ta bor’e, of bo ta cob’e un tiki yene cu tera”, Chong a señala.

El a menciona cu por compronde cu esaki ta costa hopi trabao, pero e ta pa e salud di nos hendenan, y ta desaconseha tur club y club deportivo pa uza tire, pasobra esaki ta un di e problemanan di mas grandi cu nos tin, banda di e bari di awa, y hemchi di awa, cu ta fomenta problema di sangura y pa pandemia.

“Tire ta un artefacto ideal pa sangura, si bo haya un tiki di awa aden, e ta masha dificil mes pasobra bo ta bolter y e awa ta bay otro banda y ta keda den dje”, director di GKMB a enfatiza.