Rosa Leon, coordinador, contento cu e reconocemento:
ORANJESTAD (AAN) — Fundacion Movimento ta Bida, a gana e premio maximo Appeltjes van Oranje, y Rosa Leon, Coordinador, a splica den entrevista cu DIARIO, tocante e logro aki.
Rosa Leon a bisa cu esaki ta un reconocimento pa e Fundacion y e Proyecto cu e ta bezig cu ne den comunidad di Aruba, pa nos adultonan mayor.
“E reconocimento aki, ta demostra cu nos tin un balor den nos comunidad, cerca nos adulto mayor, pero vooral cu nos a wordo reconoci den exterior ta duna mas peso na locual cu nos ta haciendo di duna un empuhe na adultonan mayor, y vooral duna nan conocemento di e importancia di ta activo durante e edad di 60 aña y mas”, Rosa Leon a expresa.
Rosa Leon a duna di conoce ta cu loke nan a puntra na e cabesante di Oranje Fonds, ta kico e fundacion a haci cu a gana e premio maximo aki, y esaki ta cu e fundacion ta traha cu y pa adulto mayor, y nan a wak cu e proyecto di Movimento ta Bida, ta duna balor na e conocemento di cada adulto mayor y nan a traspasa pa un otro cu, di un of otro, manera tin mester di dje.
El a splica cu tur aña e fundacion ta entrega un verslag y a base di esaki nan ta wak cuanto hende nan ta abarca, y nan ta wak con e desaroyo di e proyecto ta y con nan ta traha e programanan. Y cu nan ta incorpora e adulto mayor den kico ta e necesidad cu ta reina eyfo. A base di esey e fundacion ta duna forma na e programanan cu nan ta ofrece.
“Y mirando tambe e añanan cu nos ta bezig cu e programa esey a haci cu nos a bay cu e premio mayor”, Rosa Leon a subraya.
El a agrega cu esaki ta demostra na e organizacionnan local y tambe na gobierno, cu tur e añanan aki nan a traha sin ningun subsidio, solamente di exterior, y e biaha aki ta demostra cu e balor t’ey y cu mester sosten di e comunidad di Aruba y pa gobierno pone un tiki den e pot di e fundacion. “Esaki ta pone un extra peso, ya nos tin un premio bastante reconoci, y vooral cu nos ta e prome grot apel den full Caribe. Esey ta haci un extra peso riba nos trabao y esey no ta descarta cu nos ta bay bati na porta di e gobierno nobo pa wak si nos por haya sosten”, Rosa Leon a conclui.
