Tipico Colegio Arubano ta presenta concierto di Pasco riba diahuebs anochi

Docentenan Jaderick Croes y Christina Petrocchi

ORANJESTAD (AAN) – Maria Christina Petrocchi y Jaderick Croes, ta dos docente di Musica, na Colegio Arubano, y ambos ta miembro di e Scol Band cu yama Tipico Colegio Arubano, cu ta un grupo cu ta participando den festivalnan cultural y a sali tambe cu premio den varios di e festivalnan aki.

Jaderick Croes y Christina Petrocchi a elabora den un entrevista cortico cu Matutino DIARIO kico ta bay ta e evento cu lo tuma lugar Diahuebs 5 di December awo na Colegio, y cu ta un Concierto cu nan ta bay duna cu Tipico Colegio Arubano Band.

Jaderick a duna di conoce cu nan lo ta presentando specialmente cancionnan folklorico, musica di Pasco y moderno, y Christina a añadi cu lo toca un par di cantica di carnaval, pa tur hende goza. Ademas, lo bay tin dos agrupacion musical cu lo ta Lurk y e banda di Universidad di Aruba “UA band”.

Lo bay tin bar y cuminda bon surti y tin vendors cu lo bende cookie, cinnamon rolls, popcorn, snacks y artesania. E Concierto ta bay ta na Colegio Arubano di 6.30 or di atardi pa 10.30 or di anochi.

“E evento aki ta pa colecta fondo pa e Banda Tipico Colegio Arubano, ya cu nos tin diferente acuerdo cu nos kier yega na dje, pero e meta principal, ta pa nos haya uniform pa ora nos tin presentacion, manera Dia di Betico, of Dia di Himno y Bandera, pa nos ta nechi presenta, y pa ora nos presenta den e festival di Dande nan ta uniforma” Christina a menciona.

Banda Tipico Colegio Arubano a wordo funda na aña 2020, y casi tur integrante ta alumno di Colegio y tambe tin un par cu a gradua na Colegio Arubano”, Christina a relata. Entrada ta 5 florin so.

Christina y Jaderick kier a invita pueblo di Aruba pa bay presencia e Concierto aki y disfruta hunto cu nan.