Cocolishi nobo pa Aruba ta hiba e nomber di ‘Caquetio’

Cocolishi nobo descubri den lama rond e isla

ORANJESTAD (AAN): Un descubri un cocolishi nobo den e awanan di Aruba. Malakoloog Leo Ros a haci entrega oficial e siman aki na Prome Minister di Aruba, di e cocolishi nobo aki, cu awo ta carga e nomber ‘Caquetio’.

   Debi na e interes genuino cu premier tin pa e estudio maritimo aki, a haci entrega di un reconocemento na su persona y nombracion di e descubrimento di cocolishi Caquetio.

   Durante bishita, Prome Minister Eman a ricibi un copia firma di e publicacion “The Archaeology of Aruba: The Marine Shell Heritage”, caminda ta mustra nan gradicimento sincero

   A comparti informashon importante tocante especie nobo endemico di cocolishi marino, cu recientemente a worde nombra na honor di e tribu Caquetio—e habitante original indigena di Aruba. E siguiente informashon ta referi na e especie nobo:

   Voluta Caquetio Berschauer & Ros, 2025

   Distribucion: Especie endemico den costa west di Aruba, e banda pabou di costa, caminda su habitat ecologico natural ta worde sosteni.

   Ecologia: E especie di cocolishi marino aki por worde haya den awa cerca di costa entre 2 te 9 meter di profundidad, riba fondo di lama of bou di coralnan, scondi den santo bou di coral kibra, of entre yerba marino Thalassia testudinum (K.D. Koenig, 1805).

   Etimologia: E nomber ta dedica na e Indjan Caquetio, e pueblo indigena di Aruba y banda noordwest di Venezuela. E Caquetio tabata ocupa Aruba pa milenio, y e cocolishi a representa un recurso natural importante integra den nan cultura (Dijkhoff & Linville, 2004). E nomber ta un relaciona /referi directo na tribu Caquetio.

   Nos ta contento cu e investigadonan ta sigui contribui na conocemento y educacion tocante e cocolishinan marino y nan ambiente den e bunita isla di Aruba, ta locual cu Leo Ros a indica.

Franchelle Lacle, consehero pa Bureau Naturalesa y Medio Ambiente, tambe a duna un splicacion breve riba e bishita cerca Prome Minister Eman awe. Interes pa e parti marino a hiba na descubrimento di un cocolishi cu ta unico pa Aruba (endemico na Aruba).

   Durante un bishita den luna di mei, a otorga Mr. Ros un buki caminda e por a sigui e historia di cocolishi den nos area y un indicacion via arkeologonan, riba e uzo di cocolishi antes riba nos isla. Di aki a surgi e nomber di e cocolishi cu recien a keda descubri.