ORANJESTAD (AAN): Prome Minister Evelyn Wever-Croes a duna di conoce tin cierto desaroyonan ta tumando lugar y ta bay tuma lugar pa loke ta e area di Colony.
El a indica cu ta trahando riba e desaroyo di e area di Baby Beach y Rodgers Beach. Tin varios desaroyador cu a expresa interes pa haci inversionnan den e area aki.
E mandatario a laga sa cu el a pidi e departamentonan di gobierno cu ta encarga cu infrastructura (DOW, DIP, DNM y Kadaster) pa nan sinta hunto y pa traha un conseho pa gobierno riba criterianan obhetivo pa asina evita cu e ta bira algo "cu ken conoce ken".
El a agrega cu a traha riba un matrix unda diferente criteria ta poni bao di otro teniendo cuenta cu e aspecto di infrastructura, medio ambiente, capacidad di carga, economicamente, e gapnan cu tin den e ROP y ROPV y nan a yega na algun proposicion interesante y na un forma hopi obhetivo cu a wordo presenta na Minister di Asuntonan Economico y Minister di Turismo. Aworaki ta den e fase final, Wever-Croes a señala.
Ora cu e ultimo decision ta wordo tuma y nan sinta cu e desaroyadornan cu nan compromiso, lo haci un presentacion di e proyectonan aki.
Premier Wever-Croes a expresa cu no ta ansha ni pura pa haci esaki prome cu eleccion pasobra esaki no tin cu haber cu eleccion, pero e tin di haber cu desaroyo.
E desaroyo aki ta inclui, a agrega, boutique hotel, facilidadnan manera restaurant banda di Rodgers Beach, kiosconan na Baby Beach. Tambe kier renoba e misa cu tin den Colony y trece bek den su estado original y protehe esey tambe.
E desaroyo aki no ta bin di Gobierno pasobra ta trata di desaroyadornan cu ta interesa den inverti. Gobierno no tin placa.
E misa, a bisa, tin un peticion di Monumentenfonds pa tuma e proyecto over pa restaur'e y trece bek na bida pasobra gobierno no tin cen pa hacie', e mandatario a enfatisa.
Pa loke ta e casnan den Colony, si dicidi cu tin cu basha e casnan abao, e ora si ta gastonan di gobierno y cu mester wak di unda ta haya e fondonan aki.
Tin un plan cu e minister anterior a laga cla pa un desaroyo nobo di vivienda den Colony. Tin hopi area cu ta bashi y eynan tin un desaroyo nobo proyecta, pero gobierno no tin placa pa e infrastructura. Esey si mester warda un rato te ora cu recupera financieramente pa wak si ta continua cu esey, a agrega.
Pa loke ta lusnan ta yegando na un fase final di palabracion cu Elmar NV. Pa loke ta e tema di desperdicio y barinan di sushi, esey ta algo cu apesar cu ta costa placa cu mester hacie.
E careteranan ta den proyeccion caba pa wordo drecha y esey ta den presupuesto, a bisa.
