ORANJESTAD (AAN) – E conferencia di prensa di Fraccion di MEP, diaranzon mainta, tabata na encargo di Parlamentario Setty Christiaans- Yarzagaray.
Yarzagaray a tuma nota di e “Economic Outlook”, di Departamento di Asuntonan Economico, cu a sali recientemente, y cu ta un proyeccion basa riba aña 2021-2023, unda por nota kico por spera Aruba su economia pa, por lo menos, e siguiente dos añanan.
E dama parlamentario a bisa cu MEP sa cu tabata hopi dificil pa yega na e pronosticonan aki, pa motibo cu no por a premira exactamente, mirando e pandemia di Covid-19 y e impacto di e crisis cu a haci dificil pa yega realmente, na kico ta e indicacionnan y kico ta bay sosode.
Aworaki ta asina leu, basa riba informacion di e cuentanan nacional di CBS. Por nota cu si bay bek na 2020, despues di e entrada di e pandemia, e economia a sufri un caida di 25.2%. E impacto aki ta un poco menos cu loke a wordo premira, e parlamentario a bisa.
Loke aworaki si ta mas alentador ta cu pa 2021 Aruba su economia ta bay experiencia un crecemento di 5.1% y pa 2022, lo experiencia un crecemento di 6.2%.
Esaki riba su mes na nivelnan di GDP nominal, cu ta nifica por ehemplo cu den aña 2021 esaki lo yega na 72.6% di locual e tabata na aña 2019; y na aña 2022 e lo ta 83.8% di lo cual tabata na 2019.
Christiaans-Yarzagaray a reitera e palabranan di minister di finanzas, cu e escenario aki ta cautelosamente optimista pa motibo cu no por premira kico realmente ta pasa.
El a bisa cu tur señal ta indica cu e pandemia aworaki ta wordo maneha, alomenos na Aruba pasobra awo tin cu contene e parti local, pero nos pais ta wordo afecta pa e parti di afo tambe.
El a reitera tambe cu na Aruba, actualmente tin 66 mil ciudadano vacuna, cu ta un 67% di henter nos poblacion di 18 aña y mas.
Te cu Diamars tabata tin 18 caso activo so, y tur esaki ta indicadornan cu e maneho di covid ta na e nivel cu e ta logra por tin tambe sosten, pasobra un bez cu covid no ta bon maneha e economia tambe ta tranca.
Sinembargo Aruba ta proyectando pa yega na 85% di e poblacion vacuna y lo bay tin diferente actividad pa purba promove esaki. Y ya, den e poblacion di 60 plus 70% di nan ta vacuna y esaki ta hopi importante, pasobra experiencia di Aruba ta cu ta e grupo aki ta esun cu a sufri mas, den sentido di perdida di bida, cu comunidad ta lamenta na final di dia.
Yarzagaray a agrega cu esaki ta un bon señal cu famianan ta cuida otro, y nos ta bayendo riba un bon rumbo y por mire tambe cu e activacion di e turismo e dianan aki. E ta un bon noticia, el a subraya, cu cruseronan ta bolbe drenta Aruba y no ta solamente parkeer den nos waf. Tambe den esaki ta keda cauteloso pa wak si tur cos ta keda, manera e tabata prome, riba e maneho di salud.
